حوكمەتا فیدرال دەستكارییا نەخشەیا سەرژمێرییا هەرێما كوردستانێ كریە
بریكارێ وەزارەتا پلاندانانێ یا حوكمەتا هەرێما كوردستانێ ڕاگەهاند، ئالییێن فیدرال دەستكاری د خشتەیا سەرژمێرییا گشتی دا كریە و ب تەمامی ڕەت دكەن پشكا هەرێمێ د بودجەی دا بۆ 12.67% بهێتە كێمكرن، د هەمان دەم دا دووپاتیێ ل سەر وێ چەندێ دكەت كو مافێ دەستووریێ هەرێما كوردستانێ یە پشكا وێ ل سەر بنەمایێ 14.14% بهێتە بنەجهكرن.
سیروان محەمەد، بریكارێ وەزارەتا پلاندانانێ یا حوكمەتا هەرێما كوردستانێ گۆت» بەغدا ب ڕێكا دەستەیا ئامارێ یا فیدرال، خشتەیەك بۆ وەزارەتا وان ڤریكرییە كو ب ڕێیەكا نەیاسایی دەستكاری د هەژمارا ئاكنجییێن هەرێما كوردستانێ دا كریە».
ناڤبری ئاماژە ب وێ چەندێ كر كو د وێ خشتەی دا هەژمارا ئاوارە، پەنابەر و بیانییێن ل هەرێمێ ئاكنجی هاتینە دەرێخستن و ئاوارە ژی هاتینە ڤەگەڕاندن بۆ پارێزگەهێن دی یێن ئیراقێ، ب وێ سەدەمێ ڕێژەیا ئاكنجییێن هەرێمێ بۆ 12.67% داكێشایە، ئەڤ چەندە ژی ژ ئالیێ جڤاتا وەزیرێن هەرێما كوردستانێ ڤە ب تەمامی هاتییە ڕەتكرن.
بریكارێ وەزارەتا پلاندانانێ ڕۆهن كر كو، هەرێما كوردستانێ پێداگیریێ دكەت كو ڕێژەیا 14.14% د بودجەیا سالا 2027 و سالێن بهێت دا ببیتە بنەما.
دەربارەی زیانێن دارایی یێن وێ بڕیارا بەغدایێ، گۆت»هەكە بودجەیا گشتی یا ئیراقێ ب 100 ترلیۆن دیناران بهێتە هەژمارتن، داكێشانا وێ ڕێژەیێ ژ 14.14% بۆ 12.67%، سالانە نێزیكی ترلیۆن و نیڤ دیناران زیانێ دگەهینیتە پشكا بودجەیا هەرێمێ، ئەڤ چەندە كارتێكرنێ ل سەر پڕۆژەیێن وەبەرهینانێ، شایستەیێن دارایی، قەر و بەخشینان دكەت».
سیروان محەمەد دوپاتی ل وێ چەندێ كر كو كێشە «سیاسییە نە تەكنیكییە»، چونكی بەرێ ل سەر داخوازا هەرێمێ سێ بڕیارێن جڤاتا وەزیرێن فیدرال بۆ ڕێكخستنا سەرژمێریێ و ب تایبەتی ل دەڤەرێن كوردستانی یێن دەرڤەی ئیدارەیا هەرێمێ و ئێكلاییكرنا داتایان دەرچووبوون، لێ وەزارەتا پلاندانانێ یا ئیراقێ پێگیری وێ بڕیارێ نەبوویە».
بریكارێ وەزارەتا پلاندانانێ دیاركر ژی، سەرەدەریكرنا بەغدا ب سیاسەتا «ئینفاقا فێعلی» غەدرەكا مەزنە و د بۆری دا بوویە ئەگەرێ ب هەدەردانا سێ بۆ چار مووچەیێن فەرمانبەرێن هەرێمێ، لەورا هەكە حوكمەتا فیدرال نەزڤڕیتە سەر دەستووری، سەركردایەتییا سیاسی یا هەرێما كوردستانێ دێ ڕاستەوخوە هێتە سەر هێلێ و پەنایێ بۆ هەموو پێرابوونێن یاسایی و دادگەها بلند یا فیدرال بەت».
