به‌لگه‌یێن پێدڤى هاتنه كومكرن و كاره‌ساتا شنگاڵى 100% جینوسایده
ئه‌ڤرۆ نیوز، نه‌وزاد هلۆرى:
سه‌رۆكێ تایێ هه‌ولێر یێ سه‌ندیكا پارێزه‌رێن كوردستانێ و پارێزه‌رێ خوبه‌خش ل كه‌یسا ئێزدى و شنگاڵ دیاركر كو به‌لگه‌یێن پێدڤى بو دانه‌نیاسینا كاره‌ساتا شنگال هاتینه كومكرن و ب گوه‌رى ئه‌وان مه‌رجێن كو د كه‌یسێن جینوسایدان دا هه‌یى كاره‌ساتا شنگاڵ 100% جینوسایده.
ئه‌یاد ئیسماعیل كاكه‌یى، سه‌رۆكێ تایێ هه‌ولێر یێ سه‌ندیكا پارێزه‌رێن كوردستانێ و پارێزه‌رێ خوبه‌خش ل كه‌یسا ئێزدى و شنگاڵ بو ئه‌ڤرۆ نیوز گۆت: (نێزیكێ چوار سالایه ب هه‌ڤكاریا لایه‌نێن شوله‌ژێ ئه‌م كار لسه‌ر كومكرنا به‌لگه و دیمكومێنت و زانیارىان دكه‌ین لسه‌ر كاره‌ساتا شنگاڵ و ئێزدیان، و سوپاس بو خودێ مه شیا وێنه و به‌لگه و زانیارى و ده‌نگ و ڤیدیو و دیده‌ڤانان لسه‌ر كه‌یسا شنگال كوم بكه‌ین ، و ب گوره‌ى هه‌موو ئه‌وان به‌لگه‌یان كه‌یسا شنگال 100% جینوسایده و هه‌موو ئه‌و مه‌رجێن كو د كه‌یسێن جینوسایدێ دا هه‌یى ، تێدا هه‌نه)
زێده‌تر گۆت: (ژبه‌ركو عیراق ئه‌نداما دادگه‌ها لاهاى یا نیڤده‌وله‌تى نینه ، هه‌تا نها نه‌شیاینه ده‌نگێ ئێزدیان بگه‌هینیته ئه‌وێ دادگه‌هێ، به‌لێ نها بزاڤ دهێنه‌كرن كو ب رێیا ده‌وله‌تێن جیهانى ب تایبه‌تى ده‌وله‌تێن زلهێز ، خوه بگه‌هینین ئه‌وێ دادگه‌هێ و كه‌یسا شنگال ژى ب جینوساید بده‌ین نیاسین، به‌لێ ب مخابنیڤه هه‌تا نها عیراق هاریكار نه‌بوویه ، كو كه‌یسا شنگال ب جینوساید بهێته نیاسین، به‌لكو به‌روڤاژى عیراق رێگربوویه كو ئه‌ڤ یه‌ك نه‌گه‌هیته چوو ئه‌نجامان)
ناڤبرى د درێژاهیا ئاخفتنێن خودا دیاركر ژى كو ئێك ژ باشترین به‌لگه‌یێن دانه‌یاسینا كه‌یسا شنگال ب جینوساید، كومكرنا هه‌ند ژ سه‌ركرده و چه‌كدارێن ناسیارێن داعشێ یه ب تایبه‌تى یێن بیانى كو ئه‌و ب ده‌ڤێ خوه دیده‌ڤانیێ لسه‌ر كاره‌ساتا كومكوژى و جینوسایدا شنگالێ بده‌ن و زێده‌تر گۆت: (ژسه‌ره‌مێ 17 كه‌یسێن جینوسایدا گه‌لێ كوردستانێ، بتنێ شه‌ش ب جینوساید هاتینه نیاسین، و هه‌تا كو ئه‌و كه‌یس نه‌هێنه نیاسین قه‌ره‌بووكرنا زیانڤێكه‌فتیێن وان كه‌یسان دێ یا ب زه‌حمه‌ت بیت، و زور یا گرنگ و پێدڤى یه كو قوربانیێن جینوسایدێ ب ماددى و مه‌عنه‌وه‌ى بهێنه قه‌ره‌بووكرن ژبه‌ركو ئه‌ڤ یه‌ك مافێ قوربانیانه و چوو كه‌س و لایه‌ن منه‌تان ژ وان ناكه‌ن)
