به‌یان: مانا د گه‌ل ئیراقێ دا دێ بتنێ دیمه‌نێن بێدوماهی یێن شه‌ر و نه‌خوه‌جهیێ پێشكێشی مه كه‌ت
ئه‌ڤرۆ نیوز:
به‌یان سامی عه‌بدولره‌حمان، نوونه‌را حكومه‌تا هه‌رێما كوردستانێ ل ئه‌مریكا به‌رسڤا گۆتاره‌كا رۆژنامه‌یا نیویۆرك تایمز یا ئه‌مریكا دا كو به‌حسێ مه‌ترسییا سه‌رخوه‌بوونا كوردستانێ دكر.
بۆردێ نڤیسه‌رێن نیویۆرك تایمز بابه‌ته‌ك ب ناڤێ ( خه‌ونا مه‌ترسیدار یا كوردان بۆ سه‌رخوه‌بوونێ) به‌لاڤ كربوو و چه‌ندین به‌هانه ئینابوون كو سه‌رخوه‌بوونا كوردستانێ ژ ئیراقێ دێ یا مه‌ترسیدار بیت.
به‌یانێ ئه‌و یه‌ك ره‌ت كر و بابه‌ته‌ك بۆ وێ رۆژنامێ هنارت و ب به‌رسڤه‌كا كورت گۆت:
بجهئینانا رێفراندۆما سه‌رخوه‌بوونا كوردستانێ ل 25 ئیلۆنێ ئه‌ركه ل سه‌ر حكومه‌تا هه‌رێما كوردستانێ و دێ هێته بجهئینان. هه‌روه‌كی چاوا رێفراندۆما ده‌ركه‌فتنا بریتانیا ژ ئێكه‌تییا ئه‌ورۆپا هاته بجهئینان و هه‌كه‌ر سكۆتله‌ندا ژی ده‌نگ ب سه‌رخوه‌بوونێ دا با ب هه‌مان ئاوا دا هێـه بجهئینان، دێ دانوستان د گه‌ل به‌غدا ل سه‌ر مه‌رج و خالێن سه‌رخوه‌بوونێ هه‌بن.
یا شاش نینه كو هوون ببێژین سه‌رخوه‌بوونا كوردستانێ دێ مه‌ترسیێن خوه هه‌بن، لێ پا هه‌وه مه‌ترسیێن مانا د گه‌ل ئیراقێ دا ژبیر كرن.
ژ رۆژا دامه‌زراندنا وێ و هه‌تا نها ئیراقێ وه‌ك وه‌لاتیێن ژماره دو سه‌ره‌ده‌ری د گه‌ل كوردان دا كرییه، ل سالێن هه‌شتیان ئه‌و سه‌ره‌ده‌ری بۆ راده‌یێ جینۆسایدێ چوو و 4,500 گوند هاتنه وێرانكرن، هه‌روه‌سا كوشتن یان بێسه‌روشوونبوونا 182,000 كوردان و بكارئینانا چه‌كێ كیمیایی دژی كوردان.
حكومه‌تا تائیفی كو پشتی سالا 2003ێ ل ئیراقێ سه‌رهه‌لدا، 55 ماده ژ سه‌رجه‌مێ 144 ماده‌یێن ده‌ستوورێ ئیراقێ بنپێ كرینه د ده‌مه‌كی دا كوردان ده‌ستوور په‌سه‌ند كربوو. ده‌هـ سالان ژی پشتی بسه‌رڤه‌چوونا ژڤانێ رێفراندۆما گرێدایی كه‌ركووكێ و ناوچه‌یێن دی یێن ناكۆك د ناڤبه‌را هه‌رێمێ و به‌غدا دا لێ هه‌ر ئه‌و رێفراندۆم نه‌هاته كرن.
هێلانا ئیراقێ دێ نه‌رینێن مه یێن دیمۆكراتی یێن بخوه‌رێڤه‌برنێ و حكومه‌ته‌كا باشتر بهێز ئێخیت، زێده‌باری پاراستنا وان كه‌منه‌ته‌وه‌یێن كو ده‌ستهه‌لاتا كوردستانێ ب باشتر دبینن ژ ده‌ستهه‌لاتا به‌غدا.
مانا د گه‌ل ئیراقێ بتنێ دێ دیمه‌نێن بێدوماهی یێن شه‌رێن ناڤخۆ و نه‌خوه‌جهیێ پێشكێشی مه كه‌ت.
