بۆمبە بارانا فرۆکێن تورکی زیان گەهاندیە خەلکێ گوندێ کێستە
ئەڤرۆ نیوز، زنار تۆڤی:
شڤێدێ ل دەمژمێر 11:45 خولەک فروکێن لەشکەرێ تورکیا ب دژواری و ب دووریا 600 مەترا ژ گۆندێ (کێستە)، یێ سەر ب ناحیا کانی ماسێ ڤە، بۆمبە بارانکر، هەر چەندە د ڤێ بۆمبەبارانێ دا چ زیانێن گیانی نەبوون، لێ ڤێ بۆمبە بارانێ گەلەک زیانێن مادی گەهاندینە گۆندیان، دیسان چەندین پارچێن مەزن یێن بۆمبان ب ناڤا گوندی کەفتینە.
وەلاتیەکێ گوندێ کێستە بۆ ئەڤرۆ نیوز گۆت: فرۆکێن تورکی ئەو بۆمبە گەلەک نێزیکی گوندی داینە و ژبەر دەنگێ وان بۆمبان دیوارێن خانیێن گوندیان دەرزینە و دەرگەهـ و پەنجەرێن خانیان شکەستینە و ئەو خانیێن بانێن وان کوستیک ژی، هەموو کوستیکێ وان هاتیە خوار و گەلەک ترس ل دەف گوندیان پەیدا کریە.
ناڤهاتی گوت ژی: وان بۆمبان زیانەکا مەزن گەهاندیە مێشێن هنگڤینی یێن گوندی و هژمارەکا مەزن یا مێشێن هنگڤینی ژناڤ برینە، هەروەسا ژیانا گوندیان گەلەک نەخۆش بوویە، ژ ئەنجامێ ڤان بەردومانێن بەردەوام، دیسان ئەم وەک خەلکێ گوندی نەشێین بجینە چیایی و ئێدی ئەم نەشێین پەزێ خوە ژی ب چەرینین، ژ ترسا بۆمبەباران و تۆپ بارانکرنا سۆپایێ تورکی، هەکە ب ڤی رەنگی بیت، گوندێ کێستە دێ هێتە بەردان، هەر چەند نوکە چەند مالەک یێن ماین و دبێ رێنە، هەکە وان ژی رێیەک هەبا دا ژ گوندی چن، ژ پێخەمەت پاراستا گیانێ خوە و گیانێ زارۆیێن خوە.
