بۆچی زەلام خیانەتێ دکەن؟
ئه‌ڤرۆ:
ئەڤ پرسیارە ھەموو دەمان دھێتە کرن، بۆچی زەلام خیانەتێ دکەن؟ گەلەک ھۆکار ھەنە بەرێ زەلامی ددەتە رێیا خیانەتێ، دیارترین ئەگەر ژی ئاریشە و دوبەرەکیا ژن و مێرانە، دەمێ زەلام ئارامیێ د ھەڤبەندیا خوە دا نەبیت و گەلەک قەرقەشە د ناڤبەرا وان دا ھەبیت و ژ وێ رەوشێ دلتەنگ دبیت، ئەڤە ھەموو ھاریکاریا زەلامی دکەن پەنایێ ببەتە چێکرنا ھەڤبەندیەکا دی ژ دەرڤەی ھەڤبەندیا وان وەکو لێگەریان بۆ بێدەنگیێ و دلرەحەتیێ. ھەروەسا ژ وان ئەگەرێن دیێن بەرێ زەلامی ددەنە خیانەتێ، گرێدانا زێدە ب مال ڤە ئەوا زەلام دبێژنێ زیندان یان قەفەسک، زەلام وەسا ھەست دکەت کو ژ بنێ پێی ڤە یێ گرێدایە و نەشێت بلڤیت و گەلەک یێ پێگیرە ب بەرپرسایەتیا مالێ و زارۆیان و مەزاختیێن وان، ئەڤە فشارەکا مەزن دئێخیتە سەر زەلامی و مژوولی و دلخۆشکرن نامینن، ژیانا وی ھەموو دبیتە رۆتین و دلگرانی یا تژی پێگیری و داخوازی و فەرمان، ئەڤە دێ بەرێ زەلامی ددەتە مژوولکرنێ ل گەل ھەڤبەندیەکا دی.
ئەگەرێ دی ژ ھەموو ئەگەران پتر بەرێ زەلامی ددەتە خیانەتێ ئەو ژی کێمیا خۆشیێ یە ژ ھەڤبەندیا سیکسی، ھندەک زەلام پشتی دەمەکی ژ ھەڤژینیێ کازندا ژ تێرنەبوونا سیکسی دکەن، ئەو وێ خۆشیێ ل گەل ھەڤژینا خوە نابەت وەکو ل دەستپێکێ، ھەموو کەس حەز ژ گوھۆرینێ و سەربۆرێن نوو دکەن، ئەڤە نە بەھانەیە بەلێ راستیەکە، راستیا تەعل ئەوە دەمێ زەلام خیانەتێ دکەن دێ ھەر کەت، ئانکو سەربۆرا دویێ دێ بیتە کارەکێ رۆتینی. ھەبوونا گەلەک ئەگەران نابیتە بەھانە بۆ خیانەتێ و ل دووماھیێ بھایەکێ نەرێنی دێ کەڤیتە جڤاکی، مەرەم ژ ڤی بابەتی ئەوە کو ھزر د ئەگەرێن خیانەتێ دا بھێتە کرن و چارە بۆ بھێنە دیتن و ئەڤ دیاردە نەمینیت.
