بۆچی هندەك پەیچ د ڤەشارتی بن؟
رەیان شێرزاد
هەرێما مە ب رووبەرێ خۆ گەلەك یێ مەزن نینە و كەس زویكا ناهێنە دوورئێخستن، هەكە ل باژارێ مە كەس هەبیت پەیچێن فەیك دورست بكەن و خۆ ل پشت بڤەشێرن و گەفان ل خەلكی بكەن، ئەڤە مەزنترین ترسناكییە و بێوژدانی و نەزانینە، دوورە ژ ئیرادە و بهایێن مرۆڤاتی، هەكە مەرەم ژێ ئەو بیت رەخنێ بكەن و گلەیێن ژ حوكمەتێ ژی بكەن، پیچەكی رێ دچیتێ چونكو حوكمەتا هەرێمێ ژی رەخنێ قەبوول دكەت و دەرگەه یێ ڤەكری یە و باوەری ب ئازادیا دەربرینێ هەیە، لێ وەكو دی كو پەیچان دورست بكەن بۆ تێكدانا ئارامیا خەلكی ئەڤە تاوانەكا مەزنە، و ئەڤ كەسانە دڤێت بهێنە كونترۆلكرن ب هەمی رەنگان رێك لێ بهێنە گرتن، ب دیتنا من هەكە ئەڤ كۆمپانیێن ئەنترنێتی دەلیڤە رۆخسابیت كو خەلكەك ب ڤەشارتی برێڤەببەت ئەو كۆمپانی ژی گونەهبارن و دڤێت حوكمێن خۆ توندتر و زەلالتر لێ بكەن. چونكو ڤی سەردەمی ئەقلێ چێكری یێ دەركەفتی و هەمی تشتان بەرهەڤ دكەت هەتا وی رادەی ڤیدیۆیا بۆ مرۆڤان چێدكەت و ب بێبەختی دهێنە بەلاڤكرن. تێكدانا خەلكی دكەت ئاریشەیان بۆ چێدكەت، دڤێت ب لەز ل سەر راوەستان بۆ بێنە كرن، هەكە دێ ژبەر دەستێ مە دەركەڤیت، دڤێت سستی تێدا نەهێتە كرن، وان كەسان سزا بدەن، رێكێن دیاركرنا وان بهێنە ڤەكرن. هەكە چاوا تو كەسەكێ بێگونەه بی و بهێیە ئستیغلالكرن ژلایێ كەسەكێ ڤەرشاتی ڤە، بێبەخییا و پیلان و تەپكا بۆ خەلكی دابنیت، یان هەتكا خەلكی ببەن و داخوازا پارەی ژێ بكەن، ئەڤ باندێن خۆ ڤەدشێرن و چەند خەلك كرینە قوربان. بۆ من سەیرە كۆمپانێن ئەلكترۆنی مینا فەیسبۆكی و ئەنستایێ و تیكتۆكی قەبیل بكەن پەیچێن فەیك هەبن، دڤێت قانوونەكا ئێمناهیێ بسەپینن و نەزاهەت حاكم بیت.
ئەڤجا ئەم مللەتەكێ مەزلۆمین هەمی دنیایێ غەدرە ل مە كریە و مە گەلەك دوژمن هەنە، ژ نویكا ئەم ب خۆ ببینە دوژمنێن ئێك، گۆشتێ هەڤدو بخۆین؟! دڤێت ئەم ڤان هەستان ژی بكەین كو دوژمنێن مە بەسی مەنە ئەم ژی د ناڤا خۆ دا ل هەڤدو ببینە دوژمن؟! ئەڤە ژی دێ بیتە هاندەرەك كو زەمینە بۆ دوژمنان خۆش ببیت وەلاتەكێ وەكو یێ مە تێكبدەن.
ل ڤان دوماهیان پتر بۆ مە ئاشكرا بوویە كانێ وەلاتێن ل دژی كوردستانێ چەند كەربەكا مەزن دادرێژنە سەر مە، ئەڤە ل سەر پلاتفۆرمێن سۆشیال میدیایێ دیار دبیت، وەختێ ئەم دبینین پۆستەك ل سەر كوردان دهێتە وەشاندن چەند هێرشێن بێ رەحمانە دهێنە سەر كوردان و ب هەمی رەنگان دخوازن ملەتێ مە و ناڤێ كورد و كوردستانێ رسوا بكەن، هینگی بیرا مە دهێت كانێ چەند كەربەكا مەزن ژ مە و پێشكەفتنا مە هەیە، لەورا دڤێت ئەم ببینە میناك ملەتان بۆ هەڤدو د دلۆڤان و تاگیر بین، بەس ئێكدو ئازار بدەین.. ئەڤجا بلا بەس بن ئەڤ پەیچێن ئاشۆپی و فەیك ل بەر هەڤدو ڤەدەین و هەڤدو بخاپینین.
