بۆ ئارامیا سووریێ دڤێت دو کارێن سەرەکی بهێنە کرن
بەرپرسا پەیوەندیێن دەرڤە یا رێڤەبەریا خوەسەر دیار دکەت دڤێت بەری هەر تشتەکێ ناڤێ کۆمارا عەرەبی یا سووریێ ببیتە کۆمارا سووریێ و هەروەسا دڤێت سووریێ ب فەرمی پەروەردەیا ب زمانێ کوردی ژی قەبوول بکەت ئەو یەک بۆ ئارامیا سووریێ گرنگە.
ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر دیار کر، ژ بۆ ئارامیا سووریێ دڤێت هەر زوو دو کارێن گەلەک گرنگ بهێنە کرن، نها ل هەر جهەکێ دهێتە گۆتن کۆمارا عەرەبی یا سووریێ، ئەو یەک گەلەک شاشە، سووریێ تنێ یا عەرەبان نینە، بەلکو کورد و گەلەک پێکهاتەیێن دی ژی ل سووریێ دژین و گرنگە پەیڤا عەرەبی بهێتە دەرخستن و ناڤێ سووریێ ببیتە کۆمارا سووریێ، ئەو یەک دێ بیتە ئەگەر هەم کورد و هەم ژی نەتەوەیێن دی یێن کو ل سووریێ دژین هەست بکەن سووریێ وەلاتێ وانە و گۆت: (نابیت ناڤێ نەتەوەیەکێ ل سەر سووریێ بیت و پاشی ئەو بێژین سووریێ یا هەموو وەلاتیێن سووریێ یە، بێگومان وەکو پێنگاڤا ئێکێ دڤێت ناڤێ عەرەبی بهێتە راکرن و ببیتە کۆمارا سووریێ، وی دەمی دێ سووریێ بیتە وەلاتێ کوردان، دورزیان، عەلەویان، عەرەبان و هەموو پێکهاتەیێن دی یێن کو ب سالانە ل سووریێ دژین).
ناڤهاتیێ د پشکەکا دی یا ئاخڤتنا خوە دا ئەو یەک ژی دیار کر، کارەکێ دی یێ گرنگ ژی هەیە کو دڤێت شام بریارێ بدەت، دڤێت پەروەردەیا ب زمانێ کوردی ل سووریێ ببیتە فەرمی، دڤێت سیستەمێ پەروەردێ ل رۆژئاڤایێ کوردستانێ کوردی بیت و چەندین سالن ژی زارۆیێن کوردان ل رۆژئاڤایێ کوردستانێ ب کوردی دخوونن و دڤێت شام ژی ب فەرمی پەروەردەیا ب زمانێ کوردی قەبوول بکەت، مخابن هەتا نها ب فەرمی ئەو یەک نەهاتیە کرن و کورد ژی دلگرانن و گۆت: (هەکە شام بریارەکا وەسا نەدەت بێگومان ئەو یەک دێ بیتە ئەگەرێ روودانا ئاریشەیێن مەزن ل سووریێ، چونکی زارۆیێن کوردان ناخوازن ب زمانەکێ دی بخوونن، وان دڤێت ب زمانێ دایکا خوە بخوونن و ئەو یەک مافێ رەوا یێ کوردانە).
ئیلهام ئەحمەد د پشکەکا دی یا ئاخڤتنا خوە دا ئاماژە ب ڤێ یەکێ ژی کر کو، هەر رۆژ بەحسێ سووریایەک نوو دهێتە کرن، سەرکردەیێن وەلاتێن جیهانێ ژی هەردەم دبێژن ئەو پشتەڤانیێ ل سووریایەک نوو دکەن، وی دەمی دێ شێین بەحسێ سووریایەک نوو بکەین کو تێدا مافێن گەلێ کورد و هەموو پێکهاتەیێن دی بهێتە گەرەنتیکرن، هەرچەندە هەتا نها گەلەک تشت هاتینە گۆتن، لێ ب کریاری چو نەهاتیە کرن و گرنگە د زووترین دەم دا داخوازیێن کوردان و پێکهاتەیێن دی یێن ل سووریێ ل بەرچاڤ بهێتە وەرگرتن، ئەو یەک ژ بۆ ئارامیێ و پێکڤەژیانێ ل سوووریێ گەلەک گرنگە.
