بۆ ئێكەم جار پیڤازێن كوردستانێ بۆ دەرڤەی وەلاتی دهێنە هنارتن
رەمەزان زەكەریا
كۆمپانیەك ل بەردەڕەش سێ هەزار تەنێن پیڤازا كوردستانێ بۆ توركیا هەناردە دكەت و ئەڤ پێنگاڤە ژی پشكەكە ژ بزاڤێن حكومەتا هەرێما كوردستانێ بۆ ب بازاڕكرنا بەرهەمێ ناڤخۆیی.
ئەحمەد جەمیل، ڕێڤەبەرێ گشتیی یێ چاندنێ ل پارێزگەها دهۆكێ ڕاگەهاند: ل چارچوڤێ گرنگیدانا حكومەتا هەرێما كوردستانێ ب كەرتێ چاندنێ و بزاڤكرن بۆ پەیداكرنا بازاڕێن جیهانی، هەناردەكرنا بەرهەمێن ناڤخۆیی بۆ دەرڤەی وەلاتی ب پشتەڤانیا ڕاستەوخۆ یا حكومەتێ بەردەوامە، كۆمپانیا زەنگەنان ل بەردەڕەش سێ هەزار تەنێن پیڤازا دەڤەرێ بۆ وەلاتێ توركیا هەناردە دكەت.
ناڤبری گۆتژی: ئەڤ پێنگاڤە دێ بیتە ئەگەرێ گەشەپێدانا كەرتێ چاندنێ و پشتەڤانیكرنا جوتیاران و دابینكرنا بازاڕێن دەرەكی، هەروەسا سەلماندنا كوالیتییا بلند یا بەرهەمێن دەڤەرێ، پێشبینی دهێتەكرن ل پاشە ڕۆژێ دا زێدەباری ئەڤان سێ هەزار تەنان، پیڤازا زێدەتر یا كوردستانێ بۆ توركیا و وەلاتێن دەڤەرێ هەناردە ببیت.
كابینا نەهێ یا حكومەتا هەرێما كوردستانێ ل چەند ساللێن بووری دا پێنگاڤێن مەزن هاڤێتینە بۆ هەمەجۆركرنا ئابووری و پەیداكرنا بازاڕێن نێڤدەولەتی بۆ بەرهەمێ جوتیاران.
پارێزگەها دهۆكێ ئێك ژ دەڤەرێن گەلەك دەولەمەندێن كوردستانێ ژ ڕوویێ بەرهەمێ چاندنێ ڤە. بەردەڕەش وەك ئێك ژ ناڤەندێن سەرەكی یێن بەرهەمئینانا چاندنێ دهێتە هژمارتن و سالانە هزاران تەنێن پتاتە، پیڤاز و گەنمی ل دەڤەرێ دهێنە بەرهەمئینان.
بەری نوكە ژی هەرێما كوردستانێ چەندین بەرهەمێن وەك هنار، سێڤ، هنگڤین و پتاتە بۆ وەلاتێن كەنداڤی و دەڤەرێ هەناردە كرینە.
