بۆ شەھیدان
رێژین حكمەت
د شەڤەکا تاری دا
دەستێ من پێنووس نەدگرت
بشێم شعرەكێ بنڤیسم
کاروانێ شەهیدان، ڕوویێ من شل کر
رۆندکێن من کاغەز ڕەش کر
ئەڤێ شعرێ؛
ل بەر نالینێن دایکێن هەوە خەملا خۆ کر..
شەهید
ل ڕێکا ڤینێ،
ل سەر کۆتالا بەرخۆدانێ،
باژێڕەکە، ژ لێڤێن سپێدێ ئاڤا دکەن
ئەو نەمرن..
ئەو تیشکێن رۆژێ نە، وەلاتی گەش دكەن
وەکی پەیڤەکا پیرۆز،
پەڕێن دیرۆكێ دنەخشینن
دبنە خەتیرێن کاروانێن پێشکەڤتنێ،
تاکو ئازادی بگەهیتە هەموو خێزانان
وان ناڤێ خۆ ل سەر کەڤران نوكراندن
د ئەورێن خەمگین یێن ئاسمانێ مهدا،
خوینا پاک یا وان بوو ب بارانا ژیانێ،
یا کو گولێن سەربەستیێ ل سەر سینگێ چیا خەملاندین
و دەنگێ تابلۆیێن شەرەفێ
ل هەموو کۆلانێن وەلاتی بەلاڤکری..
شەهید پەیڤەکا مەزنە؛
ژ نەمری، ڕۆناهی و ئازادیێ پێکدهێت..
ئالا: ل بنلداھیێن بلند،
شكۆمەندییە
ڕێباز: ڕێیا وان،
ڕێیا راستیێ و ژینەکە ب روومەتە
شەهید ئەو ستێرەنە،
کەنگی شەڤ تاری ببیت،
ڕێیا کاروانی تەمام روون دبیت
ئەو چراکن ل رێكێن دوور،
چونکو بنەمایێ وەلاتی ب دەستێ وان هاتیە ئاڤاکرن..
سلاڤ ل گیانێ وان
سلاڤ ل وان گیانێن بلند و ب بها
یێن کو گیانێ خۆ کرینە قوربان بۆ ئاخا پیرۆز
هوون د ناڤ دلێ مە دا دژین،
چونکو ئێش و دیرۆکا وەلاتی ب ناڤێ وە هاتییە ڕەنگ کرن
سلاڤ ل وێ دایکا جەرگسۆتی،
یا کو ل سەر دیوارێ مالێ،
دوێنەیێ شەھیدی دفوكریت
و هێشتا ب هەناسەکا گەرم
سلاڤا ل کاروانێ نوی دکەت،
ب وێ باوەریێ کو دێ ڕۆژەکێ
ئەڤ ئاخە
ب خوینا وی بەرھەمدار بیت و
سەركەفتنێ ئینیت.