بیرەوەرییا هۆڤاتییا بۆمبەبارانكرنا قەلادزێ و رژێمێن ستەمكار
عـزەت یـوسف
كوردان، ل هەمی دەم و چەرخان، گەلەك نەخۆشی و دەردەسەری و كۆمكوژی ل سەر دەستێن دۆژمن و ستەمكار و نەیاران ب چاڤێ سەرێ خۆ دیتینە. ل ڤێرە دێ ئاماژە ب كۆشتارا قەلادزێ كەم، كو ل بەرواری 24/4/1974، ئانكو لسەر دەمێ گەرمە گەرما شۆرەشا ئیلونێ ل سەردەستێ رژێما بەعسا هۆڤ هاتبوو ئەنجامدان. ل وی دەمێ ئەم دناڤ شۆڕەشێ دا ل گۆندێن ئازاد كری بووین و مە ل وێرێ ل بەر سیبەر و گۆڕگۆڕا دەنگێ تۆپ و باڵەفڕان دخواند. باڵەفڕێن دۆژمنی ل ڤی بەرواری، 24ێ نیسانێ هێرشەكا دڕندەیا ئەسمانی ب بۆمبێن ناپالم كرە سەر باژێركێ قەلادزێ و ب كوراتی بۆردومان كر، ئەڤێ بۆردومانێ گەلەك جهێن سڤیل، ژ وانە زانكۆیا سلێمانیێ كرنە ئارمانج. دەرەنجامێ ئەڤێ هۆڤاتیێ 163 كەس شەهید و پتری 300 كەسێن سڤیل ژ وانە قوتابی بوون، جەستە و گیانێ خۆ قۆربانی كورد و كوردستانێ كرن.
رۆژا پاشتر پەیاما جەرگكوژا قەلادزێ گەهشتە مە و خواندنا مە راوەستاند، پاشی جارەكا دی مە دەست ب خواندنا خۆ د شیڤێن كویر دا كرن، و ل بن دارگویز و چناران تاقیكرن ئەنجامدان. پشتی شۆرەش كەتی ژی ئەو ساڵ بۆ قوتابی ژ كیست چوون هاتە هژمارتن.
ئەڤ تاوانا مەزن و ب دەهان تاوانێن مەزنتر حكومەتا بەغدا یا وی سەردەمی دەرحەقێ گەلێ كوردێ ئاشتیخواز و سڤیل و قوتابیان دا ئەنجامدا.. ب تنێ چونكی كورد بوون و داخازا مافێن خۆ یێن رەوا دكرن.
لێ ساڵ دهێن و ساڵ دچن و دونیا دهەژیێت لێ خراب نابیت، ژ ڤەرێژا رێكەفتنا خیانەتكاریا جەزائیر، شەڕێ هەشت سالیێ دناڤبەرا ئیراق و ئیرانێ دا بەرپابوو، ل رێكەفتی 13ی ئوكتوبەرا 1987، مووشەكەكا ئیرانێ كەتە سەر قوتابخانەكا سەرەتایی ل باشورێ بەغدا، پایتەختێ ئیراقێ، دەرەنجام 32 زارۆكێن بێ گۆنەهێن قوتابی شەهید بوون و 182 ژی بریندار بوون. پاشی رژێما سەددامی ناڤێ قوتابخانێ كرە (بیلات ئەلشوهەداو).
هێشتا ساڵ دبۆرن، دەهان سال دەرباز دبن.. ل شەڕێ كەنداڤی یێ نها، یان (شەڕێ ئەمریكا و ئیسرائیلێ ل سەر ئیرانێ)، ئانكو پاش دەربازبوونا پتر ژ 50 قوتە سالان ل سەر بۆمببارانكرنا قەلادزێ، د ئێكەم رۆژا شەڕی، ل 28 شواتا 2026 دا، قوتابخانەكا سەرەتایی یا كچان ل باژێرێ میناب ل رۆژئاڤایێ ئیرانێ كەتە بەر مووشەكەكێ، قوتابخانە ب سەر سەرێ قوتابیان دا هەڕفت و 168 كەس، كو پڕانیا وان زارۆكێن قوتابی بوون شەهید بوون. (نها وێنەیێن ئەڤان شەهیدان ل پاركەكا باژێری هاتینە نمایشكرن و ل ژێر هاتیە نڤێسین – جیهان ژ ئالیێ چەند ستەمكارانڤە دهێتە خرابكرن).
لێ یا راستی، ستەمكار ل هەر دەم و سەردەمەكی بن هەر ستەمكارن، كارەسات و تاوان ل هەر قولاچكەكا جیهانێ بن ئێكە، زارۆك و قوتابی و خەلكێ سیڤیل د بێ گۆنەهن.. ب كوشتنا وان مرۆڤ كویر دنالیت چ كێشە ئێكلا نابن.. لێ رژێمێن هۆڤ و خوینرێژ ژ وانە رژێما سەددام حوسێنی، ب خوینرێژتنێ هات و ب هەمان دەرد چوو.. مەرگەساتا قەلادزێ دێ تاوانەكا رەش و قێری و ب ئەنیا بكەرێن وێ ڤە و د مێژوویا رەشا وێ دا بۆ هەتا هەتایێ مینیت.