بیرەوەری یێن مێزەیا تۆزگرتی
ئەڤراز حامد نسری
ل سەر مێزەکا تۆزگرتی، د ناڤبەرا کۆمەکا کاغەزێن سپی دا، ئەز درێژ بووبووم، لەشێ من یێ کێمەکێ بریندار و ڕەنگێ من یێ شین یێ جاران نەمابوو، ئەز ئەو پێنووس بووم، کو خودانێ من هەمی تشتێن گرنگ ب من دنڤێسین.
من گەلەک تشت دیتن، من ئەو رۆژە ل بیرە دەمێ خودانێ من ئەز کڕیم، یێ گەش بووم، ب من نامەیێن ئەڤینیێ بۆ کچەکێ دنڤێسین، کو نوکە بوویە هەڤژینا وی، ب من ئیمزا ل سەر گرێبەستا ئێکەم کارێ خۆ کر، من دگەل وی دکرە گری دەما ل سەر کاغەزێ نڤیسی: خودێ ژ تە رازی بیت، بابۆ… ئەو ڕۆندکێن ل سەر کاغەزێ دکەفتن، ئەز دسۆتم.
نوکە، دەستێ وی یێ ل سەر من، ئەز هەست ب لەرزینا تبلێن وی دکەم، ئەوی دڤێت تشتەکی بنڤێسیت، بەلێ ئەز یێ بێهێزم، هەر جارەکا ئەو من ل سەر کاغەزێ دخشینیت، ئەز پارچەکا روحا خۆ ددەمێ داکو ب تنێ تیپەكا دی دروست بکەم، ئەز دئێشم، بەلێ کەیفا من دهێت کو ئەز یێ ب سەرفەرازی دمرم.
دەستێ خودانێ من گران بوو، وی هەستپێکر کو ئەز ئێدی یێ بێهێزم، جارەکا دی ئەز ل سەر کاغەزێ خشاندم، لێ تنێ خەتەکێ کێم و نەدیار ژ من دەرکەفت… دروست وەکو هەناسەیا مرۆڤەکی بەری چاڤێن خۆ بگریت، ئەز ب تەمامی خلاس بووم.
من د دلێ خۆ دا گۆت: ئێدی وەختێ من هات، دێ نوکە من هاڤێژیتە د ناڤ تاریاتییا زبلدانی دا و دێ ئێکێ نوی و گەش کڕیت، من چاڤێن خۆ گرتن و چاڤەڕێ بووم بکەڤمە دناڤ تاریاتیێ دا.
لێ تشتەکێ سەیر رویدا! من هەست ب گەرماتییا دەستێ وی کر، وی ئەز نەهاڤێتم، ب رێزەکا مەزن ڤە، ئەز ب سەر کاغەزێ دا بلند کرم و ب پارچەکا قوماشێ سۆر تۆزا ل سەر لەشێ من پاقژ کر، وی ب دەنگەکێ نزم گۆت: تە گەلەک بارێ من یێ گران هەلگرت، تە نهێنی یێن من پاراستن؛ تو ناهێیە هاڤێتن.
وی ئەز برم و د ناڤ قودیکەکا داری یا جوان دا دانام، ل وی جهێ کو پارە و زێڕێن خۆ یێن گرانبها تێدا دپاراستن، ل وی جهی من زانی کو ئەز نە مریمە، بەلکو ئەز وەکی پەهالەوانەکی هاتمە خانەنشینکرن.
ل وێ شەڤێ، ئەز تێگەهشتم کو بهایێ هەر تشتەکی نەیێ ب وێ چەندێ یە کا چەند یێ نوی یە، یان چەند یێ ب هێزە، بەلکو بهایێ ڕاستی د وێ خزمەت و دلسۆزیێ دایە کو پێشکێشی دەوروبەرێن خۆ دکەت، هەر تشتەکێ ب وەفاداری خزمەتێ بکەت، چو جاران بهایێ خۆ ژ دەست نادەت، هەتا ئەگەر ژ کار ژی بکەڤیت، دێ رێز لێ هێتە گرتن.
