بەرازان كارتێكرن ل بەرهەمێن جۆتیاران كریە
دێرەلۆك، مەحمود نهێلی
پشتی گەهشتنا دەرامەتی جوتیارێن سنورێ دەڤەردارییا ئامێدیێ رەڤدێن بەرازا ب شەڤانە قەستا چەمێن دەڤەرێ دكەن و زیانێن مالی دگەهیننێ و ئەڤێ یەكێ ژی كارتێكرن كریە سەر بەرهەمێن چاندنێ.
جوتیارێن دەڤەرێ چەندین رێكاران بكار دئینن، بۆ وێ یەكێ تا رادەیەكێ بشێن زیانێن دگەهیننە دەرامەتێ وان كێم بكەن، مینا داڤان و تەقتەقوشكان و ڤەدانا هەلامەتان و چەندین رێكێن دیتر، لێ تشتێ ئەڤ سالە بەربەلاڤ ئەڤە دوو سالە جوتیارێن دەڤەرێ ئەنجام ددەن، پەرژانكرنا بیستان و زەڤیانە ب نایلونێن تەیسوك و تێلێن قایم و هەروەسا دانانا گلوپێن شەحنێ یێن سمارت و چوونا شەڤانە یا ب نوبەت ل بەر چەمی.
د ڤێ دەربارێ دا جوتیارەكی ب ناڤێ رێزان جەمیل دیاركر، ئەو بارا پترێ ژ شەڤان دچیتە چەمی و ل بەر برنجی دنڤیت، بۆ وێ یەكێ نەهێلیت بەراز نێزیكی زەڤیێن وان ببن و ئەو شەڤا ئەو نەهێت ژی فانوسكا روناهییێ ل بەر برنجی ڤەدەن دا بەراز خوە نێزیكێ دەرامەتێ وانا نەكەن، لێ تشتێ باش ئەڤ سالە دەركەڤتی جورەكی نوویێ گلوپێن شەحنێ یێن سمارتە كو د گەل هەر لڤینەكێ گلوپ هەل دبن و هەروەسا ب هێزا رۆژێ كار دكەن.
ل گۆر ئاخفتنێن جوتیاران كو ب شەڤێ چەندین كەس ب تڤەنگێ دهێنە چەمی و تا بەری سپێدێ ژی دمینن بۆ وێ یەكێ بەراز زیانان نەگەهیننە دارامەتێ وان ب تایبەتی ژی زەڤیێن برنجی، لێ ئەڤ یەكە یا مەترسیە كو بەری چەند سالان ژی ببوو ئەگەرێ گیان ژ دەست دانا كەسەكێ كو ب شاشی ڤە ژلایێ هەڤالەكێ خوە تەقە لێ هاتبوو كرن و هاتبوو كوشتن.
جوتیارەكی دی بناڤێ سەلیم خویاكر، وان ئەڤ سالە رێیەكا دی ب كارئینایە بۆ دوورخستنا بەرازان ل چەمی ئەو ژی ب رێیا بەرژانكرنا بیستانا و زەڤیێن برنجی ب نایلونێن تەیسوك و تێلێ یە و گۆت: (ئەڤە ژی رێیەكا گەلەكا باشە بۆ دوورخستنا بەرازان ل چەمی و ئەم شیانە مفایەكی باش ژی ژ ڤێ رێیی وەرگرین).
ناڤهاتی ئاشكرا ژی كر، گەلەك رێیێن دی هەنە مرۆڤ بشێت بەرازا ل چەمی دوور بكەت بێ ب كارئینانا چەكی یان كوشتنا وان چونكە ب كارئینانا چەكی و كوشتنا وان ب شەڤێ یا ب مەترسیە و چێدبیت ببیتە ئەگەرێ دروست بوونا روودانا، هەروەكو یا بەری چەند رۆژان ل دەڤەرێ دروست بووی.
