بەرپرسەکێ کورد ل کەرکووکێ: عەرەبێن بێ رەگەزنامە ل سەر ئەردێ کوردان دھێنە ئاکنجی کرن
ئەڤرۆ نیوز، قائید میرۆ:
بەرپرسەکێ کورد ل کەرکووکێ ئاشکرا کر کو پێلا تەعریبێ یا بەردەوامە بۆ داگیرکرنا ئەردێ کوردان و پشتی روودانێن ١٦ی ئۆکتۆبەرێ عەرەبێن بەدو ھاتینە دەڤەرێ و گەفێن داگیرکرنا ئەردێ کوردان دکەن.
محەمەد کەمال، سەرۆکێ لیستا برایەتی ل جڤاتا پارێزگەھا کەرکووکێ بۆ ئەڤرۆ نیوز دیار کر کو ھژمارەکا زۆرا عەرەبێن شۆفێنی ھاتینە سنوورێ پارێزگەھا کەرکووکێ، ئەڤە ددەمەکی دایە ل سالێن بۆری د چارچوڤێ مادێ ١٤٠ یێ دستوورێ عیراقێ دا مفاداربووینە، بەلێ پشتی روودانێن ١٦ی ئۆکتۆبەرێ دیسان ڤەگەڕیاینە کەرکووکێ و پارێزگارێ سەپاندیێ کەرکووکێ ژی دەست د ئینانا عەرەبێن شۆفێنی بۆ کەرکووکێ دا ھەیە.
محەمەد کەمال ئاماژە دا وێ چەندێ کو ئەو عەرەبێن ھاتینە کەرکووکێ و دخوازن ئەردێ کوردان داگیر بکەن دبێژن عەرەبێن بەدو کو ئەو عەرەب د بێ رەگەزناما عیراقینە و ل سەر سنورێن د ناڤبەرا سووریا و عیراق و کوێتێ د ئاکنجینە، ددەمێ خوە دا سەدام حسێن ئیناینە سەر ئەردێ کوردان ل کەرکووکێ.