بەغدا ئاھێن خوارنێ یێن ھندەک خێزانێن شنگالێ برینە مووسل
ئەڤرۆ نیوز، لەزگین جوقی:
ئەندامەکێ جڤاتا قەزا شنگالێ دیار کر کو حوکمەتا عیراقێ وەلاتیێن شنگالێ نەچاردکەت بچنە مووسل پشکا خوە ژ ئاھێن خوارنێ یێن ھەیڤانە وەرگرن .
خەلیل حەسەن، ئەندامێ جڤاتا قەزا شنگالێ بۆ ئەڤرۆ نیوز دیار کر کو حوکمەتا عیراقێ پشکا ئاھێن خوارنێ یێن ھژمارەکا خێزانێن کوردێن ئێزدی یێن زڤرینە شنگالێ بۆ دەف بریکارین ئاھێن خوارنێ یێن عەرەب ل مووسل ڤەگوھاستینە و ئەو خێزانێن ئێزدی نەشێن بچنە دەڤ بریکارێن عەرەب ل مووسل بۆ وەرگرتنا پشکا خوە یا ئاھێن خوارنێ و گۆت: “ئەڤە چەندین جاران بزاڤ ھاتنە کرن حوکمەتا عیراقێ پشکا ئاھێن خوارنێ یێن خەلکێ شنگالێ ژ مووسل ڤەگوهێزیتە شنگالێ، لێ چو ئەنجام نەبووینە”.
ناڤھاتی ئەو ژی دیار کر کو وەسا دیارە بەغدا دگەل وەزارەتێن دی نەڤیت خەلکێ شنگالێ ل بەر دەرگەھێن مالێن خوە ل شنگالێ کەرەستێن خوە یێن خوارنێ یێن ھەیڤانە یێن کو ب رێیا بریکاران دھێنە بەلاڤکرن وەرگرن و گۆت: “پێدڤیە بەغدا ڤی کێشا شنگالیان چارەسەر بکەت”.
