بەهییا هەتاڤێ
خالد عەلی سلێڤانەیی
«ئەز»
مری یێ مرن ب خوە هێلای
ژ پاییزەكا تفال،
سەرمایێ پێ لێ وەرماندین
ڤەرەستی…
بووی هزار قەت و پرت و نەشكەستی…
ڕۆژ كرین شەكرۆك
و ب سەرێ لاندكا خۆ دا وەركری،
تژی پاخلا دەمی دەمژمێرێن دەمدز كری
دا پێڤە مژویل بیت؛
ڕتمێ خۆ گرانتر لێ بكت!
دەمێ بێدەنگیێ
نە هێلای دلێ دەهۆلا د وێ دا دخەو بچیت
و ب قێریێن مرۆڤی شەڕێ گێلەشۆكا ئێك سەلیقێ كری
رۆناهی دچرمسی
هەتا بەر ب هشا دەسپێكی دچوو
و چو ئازرێنەر نەبوون
مەبەستدارییێ تێدا بلڤینیت…
«ئەز «
ئەو رێكا دگەهم «خوە «
و ئەز نە «خوە» مە
«خوە « پرسەك مایتكەرە
گەر بەرسڤ نەدیت خوە دادعویریت
دهێت گوهۆڕین
لێ»ئەز» هەر دمینم «ئەز»!
***
ل سەر لێڤا غەوارەبوونێ
ئەو دەزیێن رۆناهی ژەنگی كرین
وەك ئێك وەریسی ژ پشتا ئاسۆیا هەلدكێشم
دكەم ئاگر و بۆ
بەهییا هەتاڤێ ددانم…
خوەزی تە دیتبا چەوا
ستێر د كونێن ڕەش دا
دەربڕینا هەڤخەمییا خوە دكەن!
خوەزی تە دیتبا چەوا
كونێن ڕەش دەڤێن خوە بۆ ڤەدكەن!
خۆزی تە زانیبا
نە هەتاڤ بوو ئاگر تێ نەمایی و ڤەمری،
هەر تارستان بوو
ئەو ژ كار ئێخستی
و پشكداری بەهییا وێ بوویی!
