ب بڕیارا سەرۆك بارزانی لقێ 27 یـێ پارتی ل بەردەڕەشێ دێ هێتە ڤەكرن
رەمەزان زەكەریا:
ب بڕیارا سەرۆك مەسعود بارزانی لقێ 27 یێ پارتی دیموكراتی كوردستان ل دەڤەرداریا بەردەڕەشێ دێ هێتە ڤەكرن.
سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ د كۆنگرەكێ رۆژنامەڤانی دا راگەهاند: «سەرۆك بارزانی بڕیارا دامەزراندنا لقێ 27 ل دەڤەرا بەردەڕەشێ دا، سەرۆك بارزانی گرنگیەكا مەزن دایە ڤێ دەڤەرێ و ئاگەهداری تایبەتمەندی و گرنگیا دەڤەرا بەردەڕەشە، ژ بەر هندێ سەرۆك بارزانی بڕیار دا، كو د زووترین دەم دا لقێ 27 یێ پارتی ل دەڤەرێ بهێتە پێكئینان و دەست ب كارێن خوە یێن پراكتیكی بكەت».
ناڤبری گۆت ژی: «بڕیارا سەرۆك بارزانی گەهشتیە مە و هەمی ئامادەكاری هاتینە كرن، بەرپرسێ لقێ و دەستەیا كارگێڕی ژی هاتینە دەستنیشانكرن، دیسا ئەڤ لقە دێ وەكو هەمی لقێن دی یێن پارتی كار كەت، هەتا ئەو دەمێ دەلیڤە دهێتە پێش ل دووڤ پەیڕەوێ ناڤخۆ یێ پارتی كۆنفرانس و هەلبژارتن بۆ بهێنە ئەنجامدان».
سەبارەت بەرپرسێ لقێ 27 یێ بەردەڕەشێ، سەربەست لەزگین گۆت: « ب بڕیارا سەرۆك بارزانی عەلی سالح مەحموود بۆ پۆستێ بەرپرسێ لقێ هاتیە دەستنیشانكرن».
بۆ زانین، عەلی سالح، كادرەكێ دیار و ناسیارێ پارتی یە و خودان مێژوویەكا پڕی خزمەتە، ناڤبری پێشتر رێڤەبەرێ گشتی یێ كۆمسیۆنا هەلبژارتنان بوو ل پارێزگەها دهۆكێ و ئیدارەیا سەربخۆ یا زاخۆ، هەروەسا ئەزموونەكا زەنگین د كارێ حزبی دا هەیە، وەكو بەرپرسێ ناوچە و كارگێڕێ لقێ و بەرپرسێ رێكخراوان، دیسا ئێك بوویە ژ پێشمەرگەیێن قەهرەمانێن شۆڕەشا گولانێ.
