ب رێژا٧٠٪ هاریكاریێن رێكخراوێن خێرخوازی بۆ ئاوارەیان كێمبووینە

ب رێژا٧٠٪ هاریكاریێن رێكخراوێن خێرخوازی بۆ ئاوارەیان كێمبووینە

33

ئەڤرۆ

دهۆك، لەزگین جوقی

رێڤەبەرێ‌ كۆچ و كۆچبەران و بەرسڤدانا قەیرانا ل پارێزگەها دهۆكێ‌ دیار كر “ب رێژا 70% هاریكاریێن رێكخراوێن خێرخوازی بۆ ئاوارەیان كێمبووینە، ئەو ئاوارێن زڤرینە شنگال دكەڤنە د مەترسیێ‌ دا، ژبەر چەكدارێن پەكەكێ‌ و توپبارانكرنا فرۆكەیێن توركیا “.

پیر دەیان، رێڤەبەرێ‌ كۆچ و كۆچبەران و بەرسڤدانا قەیرانا ل پارێزگەها دهۆكێ‌ دیار كر:” 70% هاریكاریێن رێكخراوێن خێرخوازی كێمبووینە، نوكە رێكخراوێن خێرخواز هاریكاریێن خۆ كێمكرینە و حۆكمەتا عیراقێ‌ ژی ئاستێ‌ پێدڤی هاریكاریا ئاواران ناكەت، گەلەك كێماسی هەنە، بەری نوكە پارە ل سەر ئاواران هاتە بەلاڤكرن و هندەك جاران ئاهێن خوارنێ‌ ددانە ئاواران، لێ‌ نوكە ئەڤە نەمایە، لێ‌ حۆكمەتا هەرێما كوردستانێ‌ بەردەوام هاریكاریا ئاواران دكەت”.
ئاشكەرا كر:” رێكخراوێن خێرخواز چووینە ئوكرانیا و روسیا شەری و وان كارتێكرن ل سەر رەوشا ئاواران كریە و دەمێ‌ پێنچ سال ژی ل سەر ئاوارەبوونا خەلكێ‌ را دەرباز دبن شێوەیێ‌ هاریكاریان ژی دهێتە گوهۆرین ژ كەرتێ‌ هاوار هاتنێ‌ بۆ كەرتێ‌ پەرەپێدانێ‌، هندەك پرۆژە دهێنە دروستكرن بۆ ئاواران كەسێ‌ ئاوارە كاربكەت ئەڤە هەشت سالن هێشتا بەغدا كریا كارەبێ‌ یا كەمپێن ئاواران و پارە ئەردێ‌ جوتیاران یێن كەمپ ل سەر هاتیە دانان نەمەزاختیە، ب تنێ‌ عیراق هندەك جاران ئاهێن خوارنێ‌ ددەتە ئاواران”.
پیر دەیان ، گۆت ژی:” ئەم هیڤدارین ئەڤرۆ بەری سوبەهی ئاوارە بزڤرنە سەر جه و مالێن خۆ، لێ‌ چو پلانێن باش د دەستێ‌ عیراقێ‌ دا نینن بۆ زڤرینا ئاواران، چونكو عیراقێ‌ رێكەفتنەك دگەل هەرێما كوردستانێ‌ ئیمزاكر بۆ چارەسەریا رەوشا شنگال و هەتا نوكە نەچوویە د وارێ‌ بجهئینانێ‌ دا، ئاوارە چاڤەرێنە رێكەفتنا شنگال بجهبهێت”.
خۆیا ژی كر “چەكدارێن پەكەكێ‌ چووینە دناڤ خەلكی دا ل شنگال، دەم بۆ دەمی فرۆكەیێن توركیا توپباران دكەن، ئەو خەلكێ‌ زڤریە شنگال كەڤتیە د مەترسیێ‌ دا، لەورا ژی ئاوارە ناڤەگەرن، هەتا نوكە پتری 70% خەلكێ‌ شنگال ئاوارانە و هێشتا نەشیاینە ڤەگەرنە سەر جه و مالێن خۆ، پتریا خانیێن خەلكی ل شنگال یێن هاتینە خرابكرن، هێشتا چو ئاڤەدانی نەهاتینە كرن، لەورا ئاوارە ماینە دناڤ كەمپان دا”.
ریڤەبەرێ‌ كۆچ و كۆچبەران و بەرسڤدانا قەیرانا ل پارێزگەها دهۆكێ‌ ئەو ژی نەڤەشارت و گۆت:” هەتا نوكە نێزیكی 300 هزار كەسێن ئاوارە دناڤ كەمپان و ژ دەرڤەی كەمپان ماینە، نەشیاینە ڤەگەرنە شنگال و پتری 100 هزار كەسان چووینە د شنگال دا، پتریا وان ژی ئەون یێن سەرێ‌ چیایێ‌ شنگال ماینە و نوكە یێن چووینە سەر مالێن خۆ”.

کۆمێنتا تە