دڤێت لەز د پێكهینانا كابینەیا نوو یا حوكمەتێ دا بهێتە كرن
سەرۆكێ هەرێما كوردستانێ پێشوازییا قونسلا گشتییا ئەمریكایێ كر و هەردو ئالی هەڤڕا بوون ل سەر «لەزكرن د پێنگاڤێن پێكهینانا كابینەیا نوو یا حوكمەتا هەرێما كوردستانێ دا».
نێچیرڤان بارزانی، سەرۆكێ هەرێما كوردستانێ پێشوازییا گویندەلن گرین، قونسلا گشتییا ئەمریكایێ ل هەرێما كوردستانێ كر.
سەرۆكاتییا هەرێما كوردستانێ ل دۆر وێ كۆمبوونێ دبێژیت: پەیوەندییێن ئەمریكایێ ل گەل ئیراقێ و هەرێما كوردستانێ، ڕەوشا ناڤخوەیا هەرێما كوردستانێ و پەیوەندییێن د ناڤبەرا هەولێرێ و بەغدایێ هاتنە گەنگەشەكرن.
سەرۆكاتییا هەرێما كوردستانێ د بەیاننامەیەكێ دا ل دۆر ناڤەڕۆكا كۆمبوونێ ئاماژێ ب وێ چەندێ ددەت «هەردوو ئالی هەڤڕا بوون ل سەر پێدڤییا تەباییا ناڤخوە و كاركرن و لەزكرن د پێنگاڤێن پێكهینانا كابینەیا نوو یا حوكمەتا هەرێما كوردستانێ دا».
د بەیاننامەیا سەرۆكاتییا هەرێما كوردستانێ دا هاتییە، چارەسەركرنا كێشەیێن هەولێرێ و بەغدایێ ل سەر بناغەیێ دەستووری و پاراستنا ئارامیێ، ل گەل دووماهی پێشهاتێن سیاسی و ئەمنی یێن دەڤەرێ ب گشتی، تەوەرەكێ دی یێ دیدارێ بوو.
