گرۆپه‌كێ گه‌نجێن هه‌ولێرێ بوویه به‌حسێ میدیا جیهانی
ئه‌ڤرۆ نیوز; ڤه‌ده‌ر ره‌شاڤایی:
گه‌نجێن هه‌ولێرێ گرۆپه‌ك ب ناڤێ “Mr. Erbil” ئانكو “رێزدار هه‌ولێر” دامه‌زراندییه كو شێواز و سه‌روبه‌ره‌كێ تایبه‌ت ب خوه ڤه هه‌یه و ل ڤێ داویێ ب به‌رفره‌هی د میدیا جیهانی دا دهێته به‌حس كرن.
به‌ری ساله‌كێ و ل شوباتا 2016ێ 22 گه‌نجێن هه‌ولێرێ بریارا دامه‌زراندنا گرۆپه‌كی دا كو ستایله‌كێ جیاواز یێ جلوبه‌رگ و سه‌ر و ریهان نیشان دده‌ن و وێنه‌یێن سه‌رنجراكێش و پرۆفیشنال دگرن و ئێكه‌م گرۆپێ ب ڤی جۆری یه ل سه‌رانسه‌ری ئیراقێ.
ل گۆری دامه‌زرینه‌ره‌كێ گرۆپی ئارمانجێن وان نه‌بتنێ نیشاندانا ستایله‌كی یه به‌لكو وان ل به‌ره ستۆدیۆیه‌كێ و ئاژانسه‌كا چێكرنا په‌یكه‌رێن جلكان و سه‌رتراشخانه‌كێ و درینگه‌هه‌كێ و پێشانگه‌هه‌كا تایبه‌ت یا جلوبه‌رگان درست بكه‌ن، هه‌روه‌سا ئه‌و دخوازن ناڤوده‌نگییه‌كا دی د بیاڤه‌كێ دی دا بۆ هه‌رێما كوردستانێ چێكه‌ن، لێ ئه‌و پێتڤی ب سپۆنسه‌ره‌كی نه و بزاڤێ دكه‌ن سپۆنسه‌ران به‌ر ب خوه ڤه راكێشن.
ڤی گرۆپی ل سه‌ر تۆرێن جڤاكی جه‌ماوه‌ره‌كێ باش ل خوه كۆم كرییه، میدیا جیهانی ژی ل دووڤ بزاڤێن وان هاتییه و كه‌نالێن مینا (France24) و (VOA) و (MSN) و (BBC) ..هتد گرنگییه‌كا تایبه‌ت ب حه‌ز و به‌هره‌دارییا ڤان گه‌نجان دایه.
