ب وێنە، سەدیق و كارین ناسناڤێ قارەمانیا دهۆك یا دەولەتی ب دەستڤەئینا
ئەڤرۆ نیوز، محەمەد عەلی نوری:
هەردو یاریزانێن پارێزگەهێ سەدیق عەلی و كارین كەمال ناسناڤێ قارەمانیا دهۆك یا شەترەنجێ یا پێنجێ ب دەستڤەئینا، پشتی شیاین ل سەر ئاستێ كوردان و كچان رێزێن ئێكێ بهێن، د هەڤركیێن واندا ئەوا ئەڤرۆ ب پشكداریا 37 یاریزانێن هەریمێ و وەلاتێن عیراقێ و سوریا ل هۆلا بنگەهێ لاوێن دهۆكێ ب دوماهی هاتی.
ل سەر ئاستێ كوران، سەدیق عەلی شیان رێزا ئێكێ بدەستڤەبینت پشتی حەفت خال و نیڤ كۆمكرین، هەروەسا هەردو یاریزان ڤاڤێر ئیسماعیل ب حەفت خال و نزار جەمیل ب شەش خال و نیڤ ل رێزێن دوێ و سیێ بهێن.
ل سەر ئاستێ كچان یاریزانا پارێزگەهێ و هەلبژارتیا عیراقێ كارین كەمال رێزا ئێكێ هات ب شەش خالا و خالێن خوە یێن پلەداریا جیهانێ گەهاندنە 1773 خال.
ل دۆر ڤێ قارەمانیێ، چەلەنگ حسێن ئەندامێ ئێكەتیا پارێزگەهێ و دادڤانێ دەولەتی بۆ ئەڤرۆ نیوز گوت: ئەڤ قارەمانیە سالانە ب ناڤێ پارێزگەها دهۆكێ دهێتە ئەنجامدان ئەوا ژلایێ ئێكەتیا شەترەنجا دەولەتی ڤە هاتیە پەسەندكرن و باوەرپێكرن و بۆ ماوێ شەش رۆژا یا بەردەو بوو، هەرچەندە پێشبینی دهاتە كرن رێژەكا كێم پشكداربن ژبەر كاودانێن تایبەت یێن دەڤەرێن دی یێن عیراقێ، لێ رێژا 37 یاریزانا یا باش بوو و هەڤركیەكا بهێز دهاتە كرن، بەلگەژی خودانێ ناسناڤی د دوماهی چركەیێن قارەمانیێ دا دیاربوو.
هەروەسا ناڤهاتی دیاركر ژی كو قارەمانی لدویڤ سیستەمێ سویسری نەهـ گەرا دهاتە كرن و خالێن سەركەفتیان بۆ ئێكەتیا دەولەتی هاتینە هنارتن ژبۆ زێدەكرنا خالێن وان یێن پلەداریێ و سۆپاسیا هەموو لایەنێن هاریكاری و پشتەڤانیا وان كری ژبۆ رێكئێخستنا سەركەفتی یا قارەمانیێ.
