ب وێنە: ٢٤ سالە شاشا دھوک تیڤی شروڤەکرنا موندیالێ کەت و بزانە نعمەت بۆ دھۆک بجھـ ناھێلیت
ستودیویا موندیال یا کەنالێ دھۆک تیڤی بوو دەرگەھەک بۆ حەژێکەرێن یاریا تەپا پێ ل پارێزگەھا دھۆکێ بشێن ب رێیا وێ تەماشەی یاریێن موندیالێن جیھانی بکەن ھەر ژ موندیالا ١٩٩٤ وەرە یاری ل سەر شاشا ڤی کەنالی دھێنە ڤەگوھاستن ب شروڤەکرنا زمانێ کوردی ژلایێ چەند شروڤەکەرێن پارێزگەھا دھۆکێ کو ھەر ئەڤ کەنالە بوو بۆ جارا ئێکێ شروڤەکرن ب کوردی ل سەر شاشەکا کوردی ھاتیە پێش.
نعمەت مەحمود: ژ دھوک تیڤی زێدەتر ل چو کەنالێن دی شروڤەکاریێ ناکەت
نعمەت مەحمود کەسەکێ بەرنیاسە ل سەر ئاستێ وەرزشا کوردستانێ و تایبەت ل پارێزگەھا دھۆکێ ماوێ ٢٤ سالانە خزمەتا کەنالێ دھۆک کەت وەکو شروڤەکار ھەر ژ موندیالا ئێکێ ل سەر شاشا دھۆک و ھەتا نوکە یێ بەردەوامە کو ناڤھاتی وەسا دیارکر چیاوازیەکا مەزن دناڤبەرا شروڤەکرنا بەری نوکە و یا ڤێ دەمی ھەیە ژبەرکو بەری موندیالا ٢٠٠٦ شروڤەکرن ب سانەھی تر بوو چەند ھەلبژارتیا پشتبەستن ل سەر چەند یاریزانێن ستێر دکر و یاریا وان زێدەتر یا تەک بوو، لێ نوکە یاریا تەپا پێ پێشکەفتنەکا مەزن ب خوڤە دیتی یە و یا چیاوازە و پشت بەستن سەر یاریا کوم دھێتە کرن.
ناڤبری ئاماژە ب وێ چەندێ ژی کر ب دیتنا وی ٨٥% ژ خەلکێ دھۆکێ پشتبەستن ل سەر کەنالێ دھۆک کریە بۆ دیتنا یاریێن تەپا پێ و ئەو چەندە ژی دیارکر د ھزرا وی دا نینە چو جاران شروڤەکرنێ ل کەنالەکێ دی بکەت ژ دھۆک تیڤی زێدەتر ھەر چەندە چەند کەنالان داخوازی ژێ کریە و پاداشت و ھەڤبەستێن مەزن بو پێشکێشکرینە، لێ وی رەتکرینە ژبەرکو کەنالێ دھۆکێ وەکو مالا خوە دبینت و کەنالێ دایک ل دەڤەرا بادینان.
نعمەتی ئاماژە ب وێ چەندێ ژی کر یێ دەرگەە بوو ڤەکری بھێتە دناڤ کارێ شروڤەکرنا یاریان رۆژنامەڤان جەمیل خەلیل بوو کو پشتەڤانیەکا مەزن لێ کریە و چو جاران رولێ وی ژبیر ناکەت.
ل دووماھیێ ناڤھاتی سەبارەت گوتنێن ب کەنی و دوورکەفتن ل بابەتێ شروڤەکرنێ ل ھندەک دەمان و ب کارئینانا پەیڤێن سادە دیارکر پێدڤی یە ھندک جاران ب پەیڤێن سادە باخفن دا بۆ تەماشەڤانێن کەنالی خوشتر بیت و زووتر تێبگەھیت و تەماشەڤان د ماوێ ٣٠ ھەتا ٤٠ خولەکان تەماشەی شروڤەکەران بکەت ھندک جاران بێزاری بو دورست دبیت لەورا تەماشەڤان پێدڤی گرنژینێ یە ژی.
قاسم سالح: شروڤەکارێن دھۆک تیڤی ژ چو شروڤەکارێن دی کێمتر نینن
ژلایێ خوەڤە قاسم سالح ئێک ژ وان کەسانە ل پێنج موندیالان ئامادەبووی کو سێ جاران وەکو شروڤەکار و دو جاران وەکو پێشکێشکار ل ستودیویێن موندیالێ و ناڤبری وەسا دبینت ل دەمێ شروڤەکرنێ زێدەتر ئارامرە ژبەرکو بەری نوکە یاریزانێ تەپا پێ بوو و پێزانێن تەپا پێ زێدەتر ھەنە.
ناڤھاتی ئاماژە ب وێ چەندێ ژی کر شروڤەکارێن کەنالێ دھۆک تیڤی شیانێن باش ھەنە و پێزانینێن مەزن ل دەڤ ھەنە و دویڤچوونەکا باش دکەن بەری بھێنە دناڤ ستودیویێ دا لەورا بینت ھەمی سەرکەفتی نە و خوە و ماموستا نعمەت و ھەڤالێن خوە ژ چو شروڤەکارێن دی کێمتر نابینت ل کەنالێن عەرەبی و عیراقی.
ھەردیسان خویاکر خوە وەسا دبینت ل گەل پێشکەڤتنا وەرزشێ نە کو ژ سالا ١٩٨٠ ئەو دویڤچوونا تەپا پێ یا جیھانی دکەت و ماموستا نعمەت مەحمود ژی ژ سالێن حەفتیان دویڤچوونەکا مەزن ھەیە و شارەزایا وان تێرا وێ چەندێ ھەیە بشێت ب ئاستەکێ باش و نمونە شروڤەکرنا یاریێن موندیالێ بکەن.
ل دووماھیێ قاسمی ئاماژە ب وێ چەندێ کر شروڤەکرنێ مەرجێن خوە ھەنە و پێدڤی یە کەسێ شروڤەکرنێ بکەت پێزانین باش و شارەزایەکا مەزن د تەپا پێ دا ھەبیت.
ئاڤان جەمیل: پێشکێشکار پێدڤی بەگراوەندەی یە
ژلایێ خوەڤە ئاڤان جەمیل پێشکێشکەرا ستودیویا موندیالێ ل کەنالێ دھۆک ل موندیالا ئەڤ سالە و یا ٢٠١٤ ژلایێ خوڤە دیارکر موندیال بۆ موندیالێ پێشکەڤتن ژ ھەر لایەکێ ڤە باشترە و خوە ژی باشتر دبینت ژ موندیالا بوری و پێزانینێن زێدەتر لێ ھاتینە و ل دو سالێن دووماھیێ دویڤچوونەکا مەزن ل یاریا تەپا پێ کریە و دیارکر پێدڤی یە پێشکێشکەری بەگراوەندەکێ باش ھەبیت و یێ زەنگین بیت ب پێزانین وەرزشی بەری دەست ب بەرنامەکێ وەرزشی بکەت دا بشێت جوانتر پێشکێش بکەت بۆ تەماشەڤانێن وەرزشی.
رەشید یەحیا دەراھێنەرێ ستودیویا موندیالێ: گەنجان بو پاشەروژێ بەرھەڤ دکەن
ل دووماھیێ رەشید یەحیا دەراھێنەرێ ستودیویا موندیالێ کو ھەر ژ موندیالا ٢٠٠٦ ھەتا نوکە یێ بەردەوامە دیارکر ھەر کارەکێ دەست پێ بھێتەکرن بێ گومان دێ کێماسی ھەبن و باشی ژی ھەبن و ل ماوێ بوری تایبەت ل سالێن نوتان دا گەلەک گازندە ھەبوون ژبەرکو پەیڤێن عەرەبی دناڤا شروڤەکرنێ دا ھەبوون ژلایێ مێڤانان، لێ ل گەل بورینا دەمی پێشکەفتنەکا باش ھاتیە پێش ژلایێ کەنالێ دھۆک تیڤی ڤە و نوکە شروڤەکارێن کەنالێ وان ژ ئاستێن بلندن.
سەبارەت ئینانا شروڤەکاران ب رێژەکا زێدەتر دیارکر گەلەک جاران رەوشا دارای یا کەنالی بویە رێگر
ئەو کارێ خوە بەرفرەھتر لێ نەکەن و دەرگەە یێ ڤەکریە و گرنگیێ دەنە گەنجێن وەرزشڤان داکو شارەزای بو دورست بیت و ل پاشەروژێ مفا ژێ بھێتە دیتن ب گشتی بو پارێزگەھا دھوکێ.