ب ٢١ ملیونا پارێزگەرێ دھۆکێ یانەکا پارێزگەھێ قورتالکر
ئەڤرۆ،ھەژار مەعروف:
سەروکێ یانا گارە شێروان بەشار د دیدارەکا کورت دا بۆ رۆژناما ئەڤرۆ دیارکر پارێزگەرێ دھۆکێ ل ماوێ چەند رۆژێن بوری پشتەڤانیا ئەوان کریا و کوژمەکێ پارەی دایە یانا ئەوان بوو موچەیێ یاریزانان و ب ئەوی کوژمێ پارەی گەلەک ئاریشەیێن ئەوان چارەسەر بووینە ژبەرکو یاریزانێن ئەوان بەردەوام داخوازیا ماڤێن خوە کرن و پشتی پارێزگەرێ دھۆکێ پشتەڤانیا ئەوان یا مادی کری نوکە ئاریشەیا ئەوان ل ڤی دەمی چارەسەر بوویە.
ناڤبری زێدەتر گوت: دەستپێکرنا وەرزێ ئەڤ سالە یێ خولا پێشمەرگە مە بریار دا بوو خوە ژ خولێ ڤەکێشن ژبەر قەیرانا دارایی یا یانە کەڤتیە تێدا ل وەرزێ ئەڤ سالە لێ نڤێسینگەھا پارێزگەرێ دھۆکێ بۆ مە دا دیارکرن پارێزگەرى گوتیە ئەو دێ پشتەڤانیا یانا گارە کەت بۆ پشکداری کرنێ دخولا پێشمەرگەی دا و مە پشکداری کر کو ئەڤ چەندە بەری دەستپێکرنا خولێ ب چەند رۆژا رویدا و پارێزگەرێ دھۆکێ ئەم قورتال کرین ژ خوە ڤەکێشانی ھەکە ئەو نەبا یانا گارە پشکداری دخولا کوردستانێ یا ئەڤ سالە دا نەتکر.
سەروکێ یانا گارە ئاماژە ب وێ چەندێ ژێ کر ئەڤە نە چارا ئێکێ یە نافبرى پشتەڤانیا مادی بۆ ئەوان کەت کو بەری دو وەرزان ژێ ل دەمێ ل یانا گارە پشکدار دخولا ئێک دا پارێزگەرێ دھۆکێ پشتەڤانیەکا باش بۆ ئەوان کر بوو ب ھاریکاریێن ئەوی یێن مادی رولەکێ مەزن ھەبوو بۆ سەرکەفتنا ئەوان بۆ خولا پلا ئێک و ل وەرزێ بوری رەوشا ئەوان یا مادی گەلەک یا باش بوو ژبەرکو کومپانیا نەوروز تیلکوم پشتەڤانیا ئەوان کر لێ پشتی ل وەرزێ ئەڤ سالە خوە ڤەکێشای جارەکا دی ئەو کەڤتینە د قەیرانا دارایی دا.
ل دووماھیێ سەروکێ یانا گارە دیارکر پارێزگەرێ دھۆکێ بۆ دانا موچەیێن یانێ یێن ڤێ جارێ ٢١ملیون و پێنجێ ھەزار داینە ئەوان و زور سوپاسیا پارێزگەرێ دھۆکێ کەین بۆ پشتەڤانیا ئەوی یا بەردەوام بۆ وەرزشا پارێزگەھێ .
