ب ڕەخ جاما ترومبێلێ ڤە
بەهزاد بەهرام
سلاڤ
ئاژۆتڤانا تڕومبێلا بلند و
رەنگ سپی
تە دل مینا كەڤرێ مەزن و
رەنگ سپی
بۆچی تە جام ژ نیڤێ پێهەل
هندە برە سەری؟
دل گرتی یا وێ عیناتێ و
هەردەم یا سل و
ب شەڕی
ئاژۆتڤانێ.. پێ ب حەسە
هەلما دەڤ و لێڤان
جاما تڕومبێلێ
ژ ناڤ دا و ژ دەرڤە
ژ بنی تاكو سەری
سەر و بن
راست و چەپ
ب جامێ ڤە گەلەكا پێڤە مای و هنی
قەد ژێ تێ نەپەڕی
ئاژۆتڤانێ.. لسەر جاما تڕومبیلێ
من ب تبلا شەهدێ، وێنەیێ دلی كێشا
ب هەردو دەستان
تە تیر ژ كڤانی ڕاكێشا
خوین ژ دەماران كێشا
دل گەلەك پێ هەرشی و ئێشا
ئاژۆتڤانێ.. ما قەی نزانی
خوین و ئاڤ قەد تێكەل نابن
ب جامێ ڤە خوین
هەر زوی مەهی
هەلم ژی
بوو خویسار و
بوو خوناڤ
بوو ئاڤ
دلۆپ دلۆپ
هێدی هێدی، ب جامێ ڕا
ژۆردا كەفتە خوار
ئاژۆتڤانا ترۆمبێلا بلند و
رەنگ سپی
ئەڤ چ كار و چ رەفتارە
دل ژ دل سۆهت و
بوو گرفتار..؟!
