ب ڤیدیۆ – نێزیكێ 70 ساله ئاشێ چه‌مجى یێ ته‌حینێ يێ به‌رده‌وامه
ئه‌ڤرۆ نیوز، نه‌وزاد هلۆرى:
ئاشێ ته‌حینا چه‌مجى ل ناحیا شێلادزێ ل سالێن شێستان هاتیه چێكرن ل گوندێ چه‌مجى ل ده‌ڤه‌را نێروه‌ورێكان یا سه‌ر ب ناحیا شێلادزێ ، و ل سالێن هه‌شتێیان ژبه‌ر تێكچونا ره‌وشا ده‌ڤه‌رێ ئاش هاته هێلان و خه‌لكێ وى گوندى ئاواره‌یێ شێلادزێ بوون، و پشتى چه‌ندین سالان جاره‌كا دى هه‌مان ئاش ب هه‌مان سالوخه‌ت و به‌ر ، به‌لێ ب دیزاینه‌كا جوانتر و ب كاره‌كێ باشتر ل شێلادزێ هاته دانان.
خودانى ئاشى بۆ ئه‌ڤرۆ نیوز دایه دیاركرن كو ئاشێ چه‌مجى دیروك و ناڤ و ده‌نگییه‌كان زور هه‌بویه و ل سه‌رده‌مێ خوه خه‌لكێ پرانیا ده‌ڤه‌ران قه‌ستا ئاشێ وان دكر داكو كونجیێن خوه بكه‌ن ته‌حین، و نوكه ئاشێ چه‌مجى ب هه‌مان به‌را ل شێلادزێ هاته‌دانان، و ب رێیا دارا گونجیا دقه‌لینن و ب به‌رى دهێته هێران ، و كونجیا خومالى یا شێلادزێ و ده‌ڤه‌رێ دكه‌ن ته‌حین و تامه‌كا خوش و ره‌نگه‌كێ جوان هه‌یه.
ب گۆره‌ى ئاخڤتنێن ناڤبرى ئه‌و به‌رێ بۆ ئاشى هاتیه بكارئینان سه‌نگاوى نێزیكێ 800 كیلوگرامهایه، و درۆستكرنا ته‌حینێ ب ده‌ستى د چه‌ندین قوناغان دبوریت، و ب بهایه‌كێ گونجاى ره‌وانه‌ى بازارى دهێته‌كرن و خه‌لكه‌كێ زور حه‌ز ل كرینا ته‌حینا چه‌مجى هه‌یه ژبه‌ركو ب هه‌مان ستایلێ كه‌ڤن ته‌حینێ درۆست دكه‌ت.
ژلایه‌كێ دى ڤه بكران دده‌نه دیاركرن كو پێشتر ئاشێ چه‌مجى ل ده‌ڤه‌را نێروه‌ورێكان ناڤ و ده‌نگییه‌كا زۆر هه‌بویه و ئه‌و دخوازن كو نها ژى هه‌مان ناڤ و ده‌نگى هه‌بیت و هه‌مان شێوه و سالوخه‌ت ژى ته‌حینێ درۆست بكه‌ن، و ئه‌ڤه نێزیكێ حه‌فت روژایه ئاش كه‌فتیه كارى و خه‌لكه‌كێ زور قه‌ست دكه‌تێ و حه‌ژێ دكه‌ن.
