ب ڤیدیۆ – گه‌نجه‌كێ شێلادزێ ب ئامیرێن ساده له‌شه‌كێ جوان بۆخوه درۆستكریه
ئه‌ڤرۆ نیوز، نه‌وزاد هلۆرى:
گه‌نجه‌كێ كۆمه‌لگه‌ها سیریێ یا سه‌ر ب ناحیا شێلادزێ ڤه ب رێیا هنده‌ك ئامیرێن ساده و د ژۆره‌كا ساده دا شیایه جوانترین له‌ش بۆخوه درۆست بكه‌ت بێى كو رۆژه‌كێ بچیته هۆله‌كا له‌ش جوانیێ.
سوهه‌یب كریادێرى، دياركر هه‌كه مرۆڤى ئیراده‌‌كا ب هێز هه‌بیت، دشێت ب رێیا ئامیرێن ساده ژى بگه‌هیته ئارمانجا خوه كو ئه‌و ژى په‌یداكرنا له‌شه‌كێ جوانه و بۆ ئه‌ڤرۆ نیوز گۆت: (هه‌ر ژ زاروكینى هه‌تا نها من حه‌زا له‌شه‌كێ جوان و وه‌رزشى هه‌بوویه ، ئه‌ڤه دو ساله ئه‌ز حه‌فتیانه چار روۆژان و هه‌ر رۆژێ ده‌مژمێره‌كێ ب ئامیرێن خوه یێن ساده وه‌رزشێ دكه‌م).
زێده‌تر گۆت: (ئه‌و ئامیرێن ساده من بۆ خوه چێكرینه و په‌یاما من بۆ هه‌موو گه‌نجان ئه‌وه نه مه‌رجه كو مرۆڤ بچیته هۆلێن له‌شجوانیێ و خودان راهێنه‌ر بیت ، به‌لكو هه‌كه مرۆڤى ئیراده‌‌كا بهێز هه‌بیت مرۆڤ دشێت ب رێیا ئامیرێن ساده ژى بگه‌هیته ئارمانجا خوه كو ئه‌و ژى په‌یداكرنا له‌شه‌كێ جوانه).
سه‌لام نه‌سروللا هاریكارێ وى گه‌نجى دیاركر سوهه‌یبى حه‌زه‌كا مه‌زن بۆ له‌شجوانیێ هه‌یه و ئامیرێن ساده نه‌بووینه رێگر كو ئه‌و شیانێن خوه ڤه‌شێریت وبۆ ئه‌ڤرۆ نیوز گۆت: (سوهه‌یب رۆژه‌كێ ژى نه‌چویه هۆلێن له‌ش جوانیێ ئه‌ڤجا ژبه‌ر نه‌بوونا هۆلێن له‌شجوانیێ و نه‌بوونا ده‌مى بیت یان ژى چونكى قوتابیه و زێده‌تر مژوولێ خواندنێ یه ، ئه‌وى بۆخوه ئامیرێن ساده درۆستكرینه و رۆژانه وه‌رزشێ ل سه‌ر دكه‌ت ،و ئه‌ز وه‌كو ئێك ژ كه‌سوكارێن وى و هاریكاره‌كێ وى ل گه‌ل دامه و راهێنانان ب وى دكه‌م).
زێده‌تر گۆت: (سوهه‌یب ب پێنج ئامیرێن ده‌ستكرد یاریێن گه‌له‌ك جوان و سه‌رنجراكێش دكه‌ت و شیایه له‌شه‌كێ جوان بۆ خوه درۆست بكه‌ت بێى كو خوارنێن ب هێز و پروتینى بخوت و بكاربینیت، كو ئه‌ڤ یه‌ك جهێ حێبه‌تى و شانازیێ یه و ئومێدا مه ئه‌وه كو لایه‌نێن شوله‌ژێ هاریكاریا وى بكه‌ن داكو ئه‌و بشێت د قاره‌مانیان دا پشكدار بیت).
