ب گوژمێ پتر ژ ملیار دیناران پڕۆژەیێن كارەبێ ل دەڤەرا ئامێدیێ هاتینە بجهئینان
ئامێدیێ، مەحموود نهێلی:
ژ بۆ پتر خزمەتكرنا وەلاتیان و گەهاندنا پڕۆژەیێن خزمەتگوزاری ژ بۆ وەلاتیان، ب تایبەت د وارێ كارەبێ دا، ب گوژمێ پتر ژ ملیار دیناران هەژمارەكا پڕۆژەیێن كارەبێ ل سەرانسەری دەڤەردارییا ئامێدیێ هاتینە بجهئینان و كەفتینە د خزمەتا خەلكێ دەڤەرێ دا.
ئەندازیار ئارام جەلال سەعید، رێڤەبەرێ بەلاڤكرنا كارەبا دەڤەردارییا ئامێدیێ بۆ رۆژناما ئەڤرۆ دیار كر، د بەردەوامییا كار و پڕۆژەیێن خزمەتگوزاری دا ل دەڤەرێ، هەژمارەكا پڕۆژەیێن كارەبێ ل سنۆرێ دەڤەردارییا ئامێدیێ هاتینە بجهئینان و كەفتینە د خزمەتا خەلكێ دەڤەرێ دا، مینا پڕۆژەیێن: تەمامكرنا رۆناهیا جادەیا سەرەكی ل دێرەلۆكێ و دانانا چەندین گهۆڕكان و رۆناهیكرنا ناڤا كۆمەلگەها هێتویت و گەهاندنا هێلا كەرەبێ بۆ بانیا چەلكێ و بیرا ئاڤا گوندێ مێرگێ و بێخیرێ ل سنۆرێ ناوچەدارییا دێرەلۆكێ ب گوژمێ 678 ملیۆن دیناران ل سەر بودجەیا پارێزگەها دهۆكێ.
ناڤهاتی گۆت: «ل سەنتەرێ دەڤەردارییا ئامێدیێ، پڕۆژەیێ دانانا گهۆڕكان و گەهندنا هێلا كارەبێ و سەخبێركرنا ڕۆناهیا سەنتەرێ دەڤەرداریێ و گوندێن دەوروبەر ب گوژمێ 388 ملیون دیناران ب داوی هاتیە، ل ناوچەدارییا شێلادزێ ژی پڕۆژەیێن دانانا گهۆڕكان بۆ بارسڤككرنا گهۆڕكێن كارەبێ و رۆناهیكرنا جادەیێن سەرەكی و گەهاندنا هێلا كارەبێ بۆ نەخۆشخانەیا شێلادزێ ب گوژمێ 165 ملیۆن دیناران ب داوی هات و كەفتە د خزمەتا وەلاتیان دا».
گۆت ژی: «ل سەر بودجەیا تایبەتا پارێزگەها دهۆكێ گوژمێ ئێك ملیار و 131 ملیۆن دیناران ژ بۆ ئەنجامدانا ڤان پڕۆژەیان ل دەڤەرێ هاتبوونە تەرخانكرن».
