ب گوژمێ چوار ترلیۆن دیناران پڕۆژەیێن ستراتیژی د قۆناغا جێبەجێكرنێ دانە
رەمەزان زەكەریا
كابینەیا نەهێ یا حكومەتا هەرێما كوردستانێ دا گرنگییەكا زۆر ب كەرتی رێك و پرا دایە و زێدەتری پێنج ترلیۆن دیناران د پڕۆژەیێن رێك و پران دا هاتینە خەرجكرن و زێدەتر ژ سێ هەزار كیلۆمەتر رێكێن نوو هاتینە دروستكرن یان نۆژەنكرنەڤە.
فەرمانگەها میدیا و زانیاری، راپۆرتەكا گشتگیر ل سەر دەستكەفتێن كەرتێ رێك و پرا د دەمێ سالێن (٢٠١٩ – ٢٠٢٦) دا د كابینەیا نەهێ دا بەلاڤكر و تێدا هاتییە: د كابینەیا نەهێ دا پڕۆژەیێن تەمامبوویێن رێك و پران ٨١٠ پڕۆژەیێن جۆراوجۆرن و ب ئێك ترلیۆن و ٥٧ ملیار دینار هاتینە تەمامكرن و زێدەتر ژ سێ هزار كیلۆمەترێن رێكێن نوو هاتینە دروستكرن یان نۆژەنكرنەڤە.
پڕۆژەیێن ستراتیژی یێن د قۆناغا جێبەجێكردنێ دا ژمارەیا وان ٢٢٧ پڕۆژەیێن ستراتیژی نە، ب درێژاهیا ٢,٢٣٩ كیلۆمەتر و ب بۆدجەیا چار ترلیۆن و ١٧٩ ملیار دینار كاری ل سەر دهێتە كرن.
د راپۆرتێ دا ئاماژە ب وێ چەندێ ژی هاتیە دان: حكومەتا هەرێما كوردستانێ ب سێ شێوازێن جودا كار ل سەر دروستكرن و نۆژەنكرنەیا رێك و پران دكەت و بۆدجەیێ بۆ دابین دكەت ئەو ژی د چارچۆڤێ بۆدجەیا وەبەرهێنانێ و بۆدجەیا ئاسایی یا رێك و پران و تەرخانكرنا %٣٠ داهاتێ وێستگەیێن كێش بۆ پڕۆژەیێن رێك و پران د ڤی چارچۆڤەیی دا د دەمێ هەیڤا تەممووزا ٢٠١٩ هەتا دەستپێكا ئایارا ٢٠٢٦ هاتیە ٨١٠ پڕۆژەیێن گرنگ یێن رێك و پران بهێنە دروستكرن یان نۆژەنكرنەڤە.
ئەو پڕۆژەیێن د چارچۆڤێ بۆدجەیا وەبەرهێنانێ دا جێبەجێكرین زۆربەیا وان پڕۆژەیێن ستراتیژین و ڕۆلەكێ گرنگ د پێكڤەگرێدانا باژێرو گوندان پێكڤە هەیە و پڕۆژەیێن وەبەرهێنانێ ڤە هاتیە ١٠٤ پڕۆژەیێن ستراتیژی یێن گرنگ بهێنە جێبەجێكرن.
د چارچۆڤێ بۆدجەیا ئاسایی یا وەزارەتا ئاڤەدانكرنێ و ئاكنجیبوونێ دا هاتیە ٤٥١ پڕۆژە بهێنە تەمامكرن، كو زۆربەیا پڕۆژەیان د چارچۆڤێ نۆژەنكرنەڤە و چێككرنا رێك و قیركرنا دا خۆ دگرن.
ل هەرێما كوردستانێ ٤٠ وێستگەهێن تایبەت ب كێشانێ هەنە كو دابەشبووینە ل سەر هەموو باژێرو باژێركان و ئیدارەیێن سەربەخۆ دا %٣٠ داهاتێ كێشانا بارهەلگران د وێستگەهان دا بۆ دروستكرن و نۆژەنكرنەڤەیا رێكێن هەرێما كوردستانێ دهێتە تەرخانكرن.
ئەو چەندە ژی هاتیە دیاركرن، سەرەڕای تەمامكرنا زێدەتر ژ ٨٠٠ پڕۆژەیێن رێك و پران و پێكڤە گرێدانا باژێر و گوندان پێكڤە، هەڤدەم سەدان پڕۆژەیێن دی یێن گرنگ ژی د بن جێبەجێكردنێ دانە.
