ب گوژمێ (906) ملیۆن دیناران جادەیێن ناڤخۆیی ل حەوشكێ هاتنە قێڕكرن
سندس سالح سلێڤانەیی:
رێڤەبەرێ گشتی یێ باژێرڤانیان ل پارێزگەها دهۆكێ دیاركر كو ب كۆژمێ (906) ملیۆن دیناران ل سەر داهاتی ناڤخۆ جادەیێن ناڤخۆی ل دەڤەرا حەوشكێ ل سنۆرێ پارێزگەها تەناهی هاتنە قێڕكرن و خەلكێ وێ دەڤەرێ ژی دلخۆشیا خۆ ب وی پرۆژەی دیاركرن و هیڤی خواستن د كابینەیا بهێت زێدەتر زێدەتر پرۆژە بۆ وان بهێنە چێكرن.
ئومێد مێڤان، شۆفێر و خەلكێ وێ دەڤەرێ گۆت: هەتا سالا بۆری دەمێ ئەم دڤان جادەیان دا د هاتن و چووین بۆمە یا ب زەحمەت بوو و گەلەك زیان دگەهشتە ترۆمبێلێن مە، ب تایبەت ژی تایرەیێن وان، لێ سوپاسیا حكومەتا هەرێما كوردستانێ دكەین كو بەری زڤستان بهێت د هاوارا مە هاتن و بۆمە جادەیێن مە قێركرن و ئەڤە ژی جهێ دەستخۆشی و سوپاسیا هەموو خەلكێ دەڤەرێ یە.
ئەندازیار (دیار بەحری) رێڤەبەرێ گشتی یێ باژێرڤانیان ل پارێزگەها دهۆكێ بۆ ئەڤرۆ گۆت: دەمەك بوو خەلكێ حەوشكێ داخوازیا خۆ گەهاند بوو باژێرڤانیا تەناهی و خواست بوون كو جادەیێن وان بهێنە قێڕكرن و چێكرن، پشتی تیمێن مە سەرەدانا وی جهی كرین و ڤەدیتن بۆ هاتینە چێكرن، مە ب فەری دیت بەری وەرزێ زڤستانێ بهێت جادەیێن وان كو نێزیكی سێ كیلۆمەتر و نیڤانە بهێنە قێڕكرن و هەلبەت ب قێڕكرنا وان جادەیان دێ ڕەوشا هاتن و چوونێ ل وێ دەڤەرێ ژی گەلەك باشتر لێ هێت و ئێدی شۆفێر گازندەیان ناكەن.
رێڤەبەرێ گشتی یێ باژێرڤانیان ل پارێزگەها دهۆكێ، هێشتا گۆت: نەبەس ل باژێرڤانیا تەناهی بەلكو ل هەموو باژێرڤانیێن دی نەخشە و پلانێن باش هاتینە دانان كو ژ هژمارەكا پرۆژەیێن خزمەتكاری یێن جوودا پێك دهێن و ئەم ب هیڤی نە هێدی هێدی هەموو ئەوە پرۆژە ب پشتەڤانیا حكومەتا هەرێما كوردستانێ بهێنە بجه ئینان.
