تابلۆیەکێ نە ژبیر
عەبدلقادر ئورمانی
ل هنداڤی باژێرێ من
ئاسمانەک پڕ جوانە
تژی ستێرێن تەیسۆکن
ئەز ژی د خەیالان دا
هێشتا زارۆکەکم
ل سەر بانێ بلندێ
کەڤنە بێلایێ
هویر هویر لێ دنێڕم و
نا لڤم و قەد نا نڤم.
جار دگڕنژم و جار
دبێژم «ماشاو الله»
چەند دبرسقن
چەند دحلیلۆکن
ب ڕندییا خۆ
چەند ب شۆکن
لێ بۆچی بار دکەن
تا سپێدێ نا مینن؟
بۆچی ئەو ژی وەک مە مرۆڤان
د دەمدەمۆکن؟
من نەڤێت بنڤم
من دڤێت ل جڤاتا وان
هەر و هەر
بمینم و ڕۆندکێن
خەم و خۆزییا
پێکڤە ب ڕێژم
ئۆمێدێن خۆ ژی
دبەرا ب چینم
هەستێن من راستینە
نە ئەندیشەنە و
نە چیڤانۆکن…
د نێڕینا ڤی دیمەنی
تابلۆیەک پڕ جوان
د چاڤێن من دا
هاتە کێشان
د تێگەهشتنا ڤی
تابلۆیێ نەژبیر
جار ئەزێ هەی و
جار ژی ئەز نینم
مرۆڤ ژی جار
بێناڤ د مینن،
جار ژی دیرۆکن…
ل هنداڤی باژێرێ من
بارانەک ئارام دباری و
ل سەر شویشەیێن
پەنجەرەیا چاڤەڕێبوونا
ئێکانەیا ژۆرا من
نیگارێن مینا
ڕۆندکێن من چپچپ
دهاتنە کێشان
لێ من نەدزانی
ئەو ژی وێنەیێن خاپینۆکن؟!
ب حێبەتی و
بێ دەنگ بەرامبەر
دراوەستم و
دل ژی دبەر ڕا د ئێشا
من تێڕا تبلێن
لەرزۆکێن کالەکی دیتن و
من زانی گەنج
چەند دپەیت و کۆکن…
تبلێن من ژی هێدی هێدی
دبوون نیگارکێش و
پێشانگەهەکا
جۆرێن دلا نیگار دکرن
جار دبوو زارۆکەک
دەستێن وی مشتی
چکلێت و شەکرۆکن…
جار ژی من تێدا خۆ ددیت
جارێ شاد و جار ژی
زۆرێ خەمگین
مینا کالەکێ خەم
ل سەر ڕوی یێن وی
د ڤی چەرخێ بێ وەفا دا
د شاد و گەڤزۆکن…
لێ ژ نشکەکێڤە
باران ب هێزتر باری
هەمی وێنە
تێکدان و ژناڤبرن
ئێدی پەنجەر ما
ل بەر دلۆڤانییا
تاڤییا و دل و تبل ژی
مان بێ نیگار کێشان،
من هینگێ زانی
ئاها هۆسا
هەستێن مە مرۆڤان
جار دلڤن
جار دبنە پیلا و نالڤن
دلسۆزی و هەستێن مە ژی
جار د خۆجهن
جار ژی ب مخابنیڤە
ئاوارەنە و جار ژی
دەربەدەر و گەڕۆکن؟
