توركیا و ئێكه‌تیا ئورۆپی دێ رێ ل په‌نابه‌ران گرن
ئه‌ڤرۆ نیوز، ئه‌یاد به‌روارى
رۆژنامه‌كا ئه‌لمانی د راپۆرته‌كا خوه‌دا ئاشكراكریه كو ئێكه‌تیا ئورۆپی و توركیا یێن گه‌هشتینه رێككه‌فتنه‌كێ ل دۆر زێده‌كرنا پاراستنا سنۆری به‌رامبه‌ر پێشوازیا ئێكه‌تیا ئورۆپی بۆ 500 هزار په‌نابه‌ران.
رۆژناما (فرانكفورتر ئالغیماینه سونتاغسزایتونغ) یا ئه‌لمانی د راپۆرتا خوه‌دا دبێژیت” ئێكه‌تیا ئورۆپی و حوكمه‌تا توركیا یێن ل هه‌فتیا بۆری یێن گه‌هشتینه وێ رێككه‌فتنێ و د سه‌ره‌دانا سه‌رۆكێ ره‌جه‌ب ته‌یب ئه‌ردوگان یا یا ئه‌ڤرۆ بۆ به‌لجیكا دێ ل گه‌ل سه‌ركردێن ئێكه‌تیا ئورۆپی ئیمزاكه‌ت.
ل دووڤ وێ رێككه‌فتنێ دێ توركیا ب شێوه‌كێ زێده‌تر پاراستنا سنۆری خوه ل گه‌ل وه‌لاتێن ئێكه‌تیا ئورۆپی كه‌ت ب ڕێیا ئه‌نجامدانا چاڤدێریا هه‌ڤپشك ل گه‌ل زێره‌ڤانێن كنارێن یونانی ل رۆژهه‌لاتا ده‌ریا ئیجه ب هه‌ڤكاری ل گه‌ل ده‌زگه‌هێ پاراستنا سنۆری ل ئێكه‌تیا ئورۆپی، د به‌رامبه‌ر ڤێ چه‌ندێ دا وه‌لاتێن ئێكه‌تیا ئورۆپی دێ رازی بن ل سه‌ر پێشوازیا 500 هزار په‌نابه‌ران كو ب گره‌نتی ژ ده‌ریایێ ببۆرن بێ مایتێكرنا قه‌چاغچیان، ل ده‌مێ رازیبوون ل سه‌ر وێ رێككه‌فتنێ دهێته كرن، دێ هێته بلندكرن بۆ سه‌رۆكێن وه‌لاتێن ئێكه‌تیا ئورۆپی ل كوپیتكا وان ل ناڤه‌راستا ڤێ مه‌هێ.
