تورك ب گڤاشتنا پرته‌قالان تۆره‌یا خوه ژ هۆله‌ندا ده‌ردبرن
ئه‌ڤرۆ نیوز:
پشتی تێكچوونا په‌یوه‌ندیێن د ناڤبه‌را توركیا وهۆله‌ندا دا، هنده‌ك خوه‌نیشانده‌رێن تورك بۆ ده‌ربرینا تۆره‌یا خوه ژ هۆله‌ندا پرته‌قال دانه به‌ر كێران و گڤاشتن.
ره‌نگێ پرته‌قالی هێمایێ شاهانه یێ هۆله‌ندا یه و هه‌لبژارتیێ ته‌پا پێ یێ وی وه‌لاتی ژی وی ره‌نگی بكاردئینیت.
پشتی هۆله‌ندا وه‌زیره‌كا توركیا كرییه ده‌ر و نه‌هێلای بانگه‌شه‌یێن سیاسی بكه‌ت، به‌رپرسێن توركیا تۆره بوون و هۆله‌ندا ب به‌رمایكێن نازییان بناڤكر و خواست ئه‌و وه‌لات لێبۆرینێ بخوازیت، لێ هۆله‌ندا ره‌ت كر و راگه‌هاند پێدڤییه توركیا لێبۆرینێ بخوازیت ژبه‌ركو سنۆرێن خوه به‌زاندنه.
