تو چ ژ گرتنا چیچكا ب دێوكانێ دزانى؟
ئه‌ڤرۆ نیوز، نه‌وزاد هلۆرى:
دێوكانه جۆره‌كێ به‌رهه‌مى یه و ماده‌یه‌كێ (چره) و ب داران ڤه دهێت، به‌لێ ئه‌و دار دڤێت ل ده‌ڤه‌رێن چیایى و بلند بیت ب تایبه‌تى ل سه‌رێ چیاى، ژبه‌ركو درۆستبوونا ڤى ماده‌ى پێدڤى ب بایه‌كێ به‌رده‌وام هه‌یه، ب چو شێوه‌یان ئه‌و ماده ناهێته خوارن به‌لێ بو گرتنا چیچك و مشك و مار و مێش و مۆران دهێته بكارئینان.
عه‌بدولخالق زاده، وه‌لاتیه‌كێ گوندێ هلورا يه ل ناحیا شێلادزێ دیاركر كو دێوكانه ئێكه ژ مادێن چر و ب دارا كنار و به‌رینێ و مازیێ ڤه دهێت و بۆ ئه‌ڤرۆ نیوز گۆت : (دكه‌ڤن دا خه‌لكى دێوكانه بۆ گرتنا چیچكا دناڤا بیستانان دا بكاردئینان چونكى زۆر زیان دگه‌هاندن هژیر و ترى و داروبارێن فێقى ، دیسان هنده‌ك جاران ژى بۆ ده‌ستكه‌فتنا گوشتێ چیچكا ل سه‌ر لێڤێن كانیان دهاتنه دانان و هنده‌ك جاران ژى دێوكانه بۆ گرتنا مار و مشك و مێش و مۆران ژى دهاته بكارئینان، چونكى زیان دگه‌هاندنه ده‌رامه‌تى و هه‌تا نها ژى ل هنده‌ك گوند و ده‌ڤه‌ران دهێته بكارئینان).
زێده‌تر گۆت: (دێوكانه وه‌كو به‌رهه‌م ل چیاى درۆست دبیت و ماده‌یه‌كێ بچوزك و گروڤره، پشتى كو ژچیایى دهێته ئینان ، دێ هێته قوتان هه‌تاكو وه‌كو هه‌ڤیرى لێ دهێت، پاشى دێ ب داره‌كێ راستڤه هێته ئالاندن و ل جهه‌كێ حه‌تاڤ هێته دانان كو تیشكێن رۆژێ لێ بده‌ت ژبه‌ركو ئه‌ڤ ماده ب گه‌رمێ رۆهن و چر دبیت و ب سیبه‌ر و ته‌راتیێ چراتى نامینیت، هه‌رده‌ما چیچك و مار و میشك و هه‌ر تشته‌ك گه‌هشته وێ دارێ كو دێوكانه لێ هاتیه ئالاندن و دانان، ئێكسه‌ر دێ پێڤه مینیت و بڤى ره‌نگى ئه‌و تشت دهێته گرتن و بیستان و ده‌رامه‌ت ژ وان جۆره بالنده و خشوكان رزگار دبن و به‌رهه‌مێ جوتیاران ژى باش و دروست دبیت).
ناڤبرى دیاركر ژى كو هنده‌ك جاران وان دێوكانه بۆ فروتنێ ل ده‌ڤه‌رێن چیایى دئینا و كیلۆیا وێ هه‌تا پێنج هزار دیناران دفرۆت و گۆت: (دێوكانه ل وه‌رزێ بوهارێ ب دارێن چیایى ڤه ب تایبه‌تى دارا به‌ریێ و مازیێ و كناریێ ڤه دهێت، و ل وه‌رزێ هاڤینێ ئه‌و دێوكانه پێدگه‌هیت، ئه‌و كه‌سێن كو دخوازن به‌رهه‌مێ دێوكانێ بكاربینن پێدڤيه د وه‌رزێ هاڤینێ دا كۆم بكه‌ن، چونكى هه‌كه ل وه‌رزێ بوهارێ بهێته كۆمكرن ماده‌یێ وێ چر نابیت).
