تیمەک ژ گەنجێن ئێزدی بۆ پاراستنا گۆرێن ب کۆم ھاتە پێکئینان
ئەڤرۆ نیوز، لەزگین جوقی:
ئەندامەکێ جڤاتا قەزا شنگالێ بۆ ئەڤرۆ نیوز دیار کر کو حوکمەتا عیراقێ پاراستنا گۆرێن بکۆم ل شنگالێ ناکەت، نوکە ل ھندەک دەڤەران خەلک ب خوە رابووینە ب پاراستنا گۆرێن ب کۆم.
خەلیل حەسەن، ئەندامێ جڤاتا قەزا شنگالێ بۆ ئەڤرۆ نیوز دیار کر کو ھەکە چو پلان بۆ پاراستنا گۆرێن ب کۆم نەھێنە دانان ڤێ زڤستانێ دێ گەلەک زیان گەھیتە ھندەک گۆرێن بکۆم و گۆت: “د ھەیاما بۆری دا لەھیێن بارانێ زیان ژی یێن گەھاندینە گۆرێن ب کۆم و نوکە خەلک چاڤدێری و پاراستنا گۆرێن بکۆم دکەن”.
ئدریس بشار، ئێک ژ رزگاربوویێن گۆرێن بکۆم ل گۆندێ کوچو دیار کر کو تورەکا پاراستنا گۆرێن بکۆم ژ گەنجیێن ئێزدیان ل کوچو ھاتە پێک ئینان، ئەڤ گەنجێن ئێزدی دێ پاراستنا ١٣ گۆرێن بکۆم کەن و گۆت: “بەغدا پاراستنا گۆرێن بکۆم ناکەت پشتی عەرەب زڤرینە دەڤەرێ ل نێزیک گۆندێ کوچو ئاکنجیبووین ترس ل دەف کەسوکارێن قوربانیێن کوچو دروست بوویە کو ئەو عەرەب شەڤەکێ بھێن وان گۆرێن بکۆم تێک بدەن و خراب بکەن داکو ئەو عەرەبێن دەست د تاوانا گۆندی کوچو دا ھەی بھێنە بەرزەکرن ژ بەر ڤێ چەندێ مە ژی بەرھەڤیێن خوە کرینە بۆ پاراستنا وان گۆرێن ب کۆم ژ تێکدانێ”.
ناڤھاتی خویا کر کو گەلەک جاران ئەو عەرەبێن تاوان دژی ئێزدیان ئەنجامداین ب مەرەما ب خۆدانکرنا ئاژەلی خوە نێزیکی گۆرێن بکۆم ل گۆندێ کوچو دکەن و گۆت: “ئەو گەنجێن ئێزدیان خوەبەخشن و خەلکێ گۆندی کوچو نە پاراستنا گۆرێن بکۆم دکەن”.
