(جفرە) بۆ هاتنە دانان و پەیاما لقێ ئێك برێیا ئێزگێ دەنگێ كوردستانێ بۆ سەرهلدانێ دگەهشتنە مە
دیدار، سالار محەمەد دۆسكی:
1-2
١٤/ ئادارێ بیرەوەری یا رۆژا ژ دایك بوونا بارزانیێ نەمرە كو و بیرەوەرییا سەرهلدان و ئازادكرنا باژێرێ دهۆكێ یە، ئێك ژ پشكدارێن سەرهلدانێ چەندین راستیێن ڤەشارتی ل سەر وێ رۆژێ ئاشكرا دكەت.
پێشمەرگەیێ شۆرەشا گولانێ و قارەمانێ سەرهلدانا باژێرێ دهۆكێ (رەجب ئیبراهیم باخورنیفی) كورێ پێشمەرگەیێ شۆرەشا ئیلۆنا مەزنە (ئیبراهیم عەلی باخورنیفی) یێ بەرنیاس ب (ئیبراهیم مەسوول) ئەڤ ناسناڤە بۆ وێ چەندێ ڤەدگەریت، كو ل سەر دەمێ شۆرەشا ئیلۆنێ و دەمێ فەرماندە (عەلیێ خەلیل) بەرپرسێ هێزا دهۆك وی دەمی هەر گوندەكی كەسایەتیەك وەك بەرپرسێ رێكخستنێ تێدا دهاتەدانان و (ئیبراهیم باخورنیفی) وی دەمی بەرپرسێ رێكخستنا گوندێ خوە بوو و هەمان دەم پێشمەرگە ژی بوو، دیسا ل شۆرەشا ئیلۆنێ هەمی گوندان هاریكاری بۆ شۆرەشێ كوم دكرن، و(ئیبراهیمێ مەسوول) رادبوو ب كومكرنا هاریكاری و ئەرزاقێ گوندێ باخورنیفێ و ب دەوران دگەهاندە بارەگایێ هێزا دهۆك ل گوندێ گەلناسكێ و كەسەكێ هاریكار و پشتەڤانێ خەلكێ گوندێ خوە بوو و بڤی ناڤی بەرنیاس بوو، ئەڤە ئێك ژ ئەگەران بوو و دەسپێكەك بوو بۆ هاتنا كورێ ویێ ئێكانە بۆ ناف شورەشێ و هەلگرتنا چەكێ شەرەفێ.
فەرماند (رەجب ئیبراهیم باخورنیفی) برایێ حەفت خوییشكا و ئێكانێ دایك و بابێن خوە ل سالا 1959 ل گوندێ باخورنیفێ ل دەڤەرا دۆسكییا ژ دایك بوویە، خواندنا خوە یا سەرەتایی و ناڤنجی و ئامادەی یا پیشەسازی ل سالا 1979 ل باژێرێ دهۆك تەمام كریە و بەردەوامیێ دەتە خواندنا خوە ل پەیمانگەه پەیوەندیان ل بەغدا، لێ ژ بەر كاودانێن وی سەردەمی نەشی یا بەردەوامیێ بدەتێ و نەچاردبیت دەست ژ خواندنێ بەردەت، ل سالا 1986 پەیوەندیێ ب شۆرەشا گولانێ دكەت و لژنا ئاكرێ یا پارتی دیموكراتی كوردستان و ل گەل شەهیدێ سەركردە (محەمەد صالح بوتی) دبیتە پێشمەرگە و پشتی ماوەكی هێزێن رژێمێ بابێ وی دەستە سەردكەن و سالەك و دو هەیڤان بابێ وی ژیانا خوە ل زیندانا بەعسیا دەرباز دكەت، ژ بەر كو ئێكانە بوو ب فەرمانەكا پارتایەتی دزڤریتە دناڤا كەس و كارێن خوە دا و بەردەوامیێ دەتە ژیانا خوە.
فەرماند رەجب باخورنیفی، ب هەلكەفتا بیروەری یا سەرهلدانا باژێرێ دهۆكێ، د دیدارەكێ دا بۆ رۆژناما ئەڤرۆ گۆت: پشتی بوویمە پێشمەرگە بابێ من هاتە دەستەسەركرن ژلایێ ئەمنێ ڤە و مالا مە هاتە دەرخستن و هەر چ بوومە نەهێلان و بابێ من سالەك و دو هەیڤان ما دزیندانێ ڤە و كەسەك نەبوو سەرەدانێ بو بكەت و ل زیندانێ نەخوش كەفت، چونكە ئێكانە بووم و برایێ حەفت خویشكا بووم و بروسكەك ژ سەری گەهشتە من و گۆت بزاڤەكێ بكە بۆ پاراستنا گیانێ باب و خێزانا خوە و نەچاربووم بهێمە ناف باژێری و چەكی بدانم و هەر ئێكسەر بابێ من هاتە ئازادكرن.
هەمان فەرماندە گۆت: پشتی ل سالا 1990 لەشكرێ ئیراقێ هێرشی وەلاتێ كوێتی كری كاودانێن وی سەردەمیێن ئیراقێ تایبەت سیاسی و ئابووری گەلەك تێكچوون و هەژاری پەیدا بوو و حوكمەتا بەعس نەشیا كونترۆلێ ل سەر هەمی دەڤەرێ بكەت، حوكمەتا بەعس نەچار بوو هندەك رێكا ببینت بۆ خەلكی و دەلیڤە بۆ خەلكی ڤەكرن كو ب رێكا پارێزگەهێ دەستیردان بهێنە دروستكرن و هەر كەسەكێ شیان هەبن و بشێت ئەرزاقی ل سەر سنوران بینتە دناف باژێری دا دەستیردان بۆ دهاتەچێكرن، رێككەفتی 20/6/1990 مە خوە گەهاندە سەر سنورێن توركیا بۆ ئینانا ئەرزاقی بۆ ناف باژێرێ دهۆك و كەسێ شارەزا درێكێ دا ل گەل مە ئەو ژی هەڤالێ مە(نەجمەدین زێوكی) بوو و مە خوە گەهاندە گوندێن نێزێكی سنوری وەك گوندێن(سێڤێ و ئەرتووش) و ئارمانجا مە ئەو بوو خوە بگەهینە بەرپرسێ لقێ ئێكا پارتی دیموكراتی كوردستان بەرێز د. (كەمال كەركووكی) و شیان هەر هەمان رۆژ خوە بگەهینێ و مە ئێك و دو ژ نێزیك دیت و بەرنامەكێ باش هاتەدانان و بوومە دو رێكخراو هاتنە دروستكرن رێكخراوا (ئارارات) بەرپرساسەتی یا وێ من كر و رێكخراوا (كوردستان) خودێ ژێ رازی (عزەدین زێوكی) بۆ بەرپرسێ وێ و مە هەردوكان ئاگەه ژ ئێك و دو هەبوو ل دهۆك و هاتن و چوونا مە ژی گەلەك جاران ل گەل ئێك بوو و ئەم چووینە دناڤا خەلكێ خوە دا و شیام وەك رێكخراوا (ئارارات) (74) كەسان ل دهۆكێ رێكخستی بكەم و هەر هەمی زەلام و ژ هەمی هوزان بوون و زێدەتر ئەم هاتینە راسپاردن بۆچوونێن خەلكێ خوە وەربگرین ل سەر هێزا دوژمنی ل باژێری و ئەگەر بزاڤەك پەیدا بیت دێ خەلكێ مە چەوا پێشوازی و پشتەڤانیێ لێ كەت و زێدەتر ئەم ل دەف وی خەلكی بووین یێ مە باوەری پێ هەی و دێ چەوا هاریكاربن بۆ نەهێلانا ڤێ زولم و ستەمێ ل سەر خەلكێ خوە.
فەرماندە (رەجب باخورنیفی) ئەو ژی دیاركر كو گۆتنێن جەنابێ سەرۆك (مەسعود بارزانی) ل (خوا كوركی) ئاماژێ گوهورینەكێ بوون، و دەمێ كەرەم كری و گۆتی نێزیك دێ گوهورین ل رۆژهەلاتا ناڤەراست بگشتی و پەیدا بن و دەڤەرا مە یا بێ بەهرنابیت، ژ ئەڤان گوهورینان و دڤێت ئەم دبەرهەڤ بین بۆ هەر گوهورینەكێ وكادان گەلەك نەباشن و بڤی رەنگی نامینت، و دیتنا حزبێ یا دروست بوو، لەوما بەری سەرهلدانێ بەرهەڤی دهاتنەكرن.
