جوانی د ناڤ كێماسی و برینان دا
جەگەر بەلۆ
د چەرخێ لەزاتی و تەكنۆلۆژیایا ئەڤرۆ دا، تێگەهەكێ وەسا دروست بوویە كو هەموو تشت پێدڤی بێ كێماسی، پاقژ و بریقەدار بن، ل سەر تۆڕێن جڤاكی، وێنەیێن فلتەركری یێن بێ پرچك و ژیانێن بێ ئاریشە دبنە پێڤەرێ جوانییێ، بەلێ پرسیار ئەڤەیە: ئەرێ جوانییا ڕاستەقینە د بێ كێماسیێ دا یە، یان د وێ كوراتییێ دایە كو پاشی تاقیكرنێن گران و برینێن ژیانێ پەیدا دبیت؟
د فەلسەفا هونەری دا، تشتێ كو بەرهەمەكێ هونەری دكەتە شاكار، بتنێ ڕێزبەندییا ڕەنگان یان ڕێكخستنا هێلان نینە، بەلكو ئەو ڕوح و هەستە یا كو ژ ناڤ دەرەز و ئازاران دا دەردەكەڤیت، وەكی ڕێبازا هونەری یا كینتسوگی دەمێ ئامانەكێ سینی دشكێت، ب زێڕی دهێتە ڤەكۆلین و دروین و ل شوێنا شكادنێ نا‌هێتە ڤەشارتن، بەلكو دكەنە خالەكا دیار و باشتر د كەرەستەی دا و ئەڤ تێگەهە ئاماژەیە كە هەر برینەك و كێماسیەك د ژیانێ دا، بڵندكرنا ئاستێ مێژوو و ئەزموونا مە یە.
ل سەر ئاستێ جڤاكی ژی، مرۆڤاتی ب بێ كێماسیێ ڕێك نەكەڤتییە. هەموو كلتوور، جڤاك و مرۆڤ تووشی تێكچوون، برینێن دەروونی و سەربۆڕێن گران دبن، ل شوینا ڤەشارتنا ڤان شكەستنان یان هەستكرن ب شەرمێ ژ بەر كێماسییان، هونەری ئەو شیان هەنە كو ڤان برینان بكەتە زێڕەكێ ڕەشەنبیری، هونەرمەندێ ڕاستەقینە ئەوە كو دشێت ژ ناڤ كەلەخێ ئازارێن جڤاكی، تابلۆیەك یان هەلبەستەكێ چێبكەت كو ببتە هیڤی بۆ پاشەڕۆژی و جوانییا ڕاستەقینە نە وێنەكێ پاقژە كو تشتەك پێ ڤە نەبیت، بەلكو ئەوە كو مرۆڤ ب وێرەكی ڤە بەرێ خۆ بدەتە هەموو شكەستن و كێماسیێن خۆ و بێژیت: ئەڤە پشكەكە ژ چیرۆكا من. دەمێ ئەم فێر دبینە كێماسییان وەك پشكەك ژ پرۆسەیا گەشەكرنێ ببینن، ئەو دەمە ئەم دەست ب تێگەهشتنا جوانییا دروست دكەین. پێدڤییە ئەم ل شوونا ئینكاركرنا برینان، ڕێزێ ل وان شوینان بگرین كو ژیانێ تێدا مە شكاندی یە و پاشی ب زێڕێ ڕاوهێلانێ و هونەری چێ بووینە ڤە.