حوكمەتا ئیراقـێ ل سـالا 1968 گوندێ دەحلكـێ ب ناپالمان بومبە بارانكـر
رەمەزان دەشتمری/ زاخۆ
7-8
ئەڤی شەڕی هەتا ڕۆژئاڤابونێ بەردەوام بی و ب ڕاستی هەمی هەڤالێن مە شەڕەك بێ وێنە دگەل لەشكرێ حكومەتا ئیراقێ كرن و زیانێن مەزن ب لەشکری كەفتن ل ڤێرێ قیشەك و تەقەمەنیێن مە گەلەك كێمبین و مە ب تنێ پێنج گولەیێن ساروخێ هەبین. من سێ كولە بەردانە لەشكری و دوو گولەیێن دیتر مە دگەل خۆە هێلان. ل دەمەكێ هەڤالان گوتن: فیشەكێن مە یێن خلاسبین. من گوتە هەڤالێن خۆە بەس خۆە ڕاگرن نوكە ئەم نەشێن خوە ڤەكێشین لەشكر دێ مە هەمیان ب دەست گرن.
ل دەمەكێ من بەرێ خۆە دایێ هەڤالێ مە شێخو مچولی بۆ لایێ مە هات و گوت: هێشتا من چوار ساجورێن گولەیێن كلاشینكوفا یێن ماین و ئەز تەك تەك تەقێ دگەل لەشكری دكەم. ئەو بوو مە ئەو فیشەك ل سەر هەڤالان بەلاڤكرن، و من گوتە هەڤالان ل دوماهیێ هەر ئێك ژهەوە گولەبەكێ وەك یەدەك دگەل خۆە ب هێلن هەكەر لەشكرێ حكومەتا ئیراقێ بۆ سەر كەلەخێ هەوە هات هوین ب چ شێوا خۆە ڕادەستی لەشكری ناكەین و پاشی خۆ ب ئەوێ گولەیا تڤەنگێ خۆە پێ ب كوژن. ئەو بوو ئێدی لەشكری چ هێرشێن دیتر بۆ لایێ مە نەكرن، و ڕۆژ چوو ئاڤا و لەشكرێ حكومەتا ئیراقێ ب سەرشوڕی پاشدا زڤڕین.
بەلێ سوپاس بۆ خودایێ مەزن د ئەڤێ چالاكیا بێ وێنەدا پێشمەرگەهێ ڕیكخراوا مە یا خەبات ب سلامەتی بۆ دەڤەرێ هاتین. ئەوبی پشتی بورینا پارزد ڕۆژان ئەم ل دەڤەرێ ماین و ل شەڤەكێ ئەز و دگەل هەردوو هەڤالێن حخۆە محەمەد تركی و حەجی حەمید ئەڤلهی بۆ ناڤ باژێڕێ زاخۆ تاخێ پیشەسازی هاتین و ب گولەیان مە تەقە ل ئەوێ زریپوشا ل بەر دەرێ ئاڤاهیێ مخابراتا ئیراقێ كر. ئەڤێ چالاكیێ ژی دەنگ ڤەدانەكا مەزن ل ناف خەلكێ زاخۆ دەنگ ڤەدا و پاشی ئەم بۆ پاشدا د ڕێكا پشتا گوندێ چەمسیرمو چوین و هەر ل ئەوێ شەڤێ ئەم بۆ گوندێ مێرگەسورا چوین و ل وێرێ ماین. ئەم ل جەولێ دا ماین بی سالا 1983ی ئەو دەمێ مە بوسە ل سەر جادا گشتی ل ناڤبەرا گوندێ سەرسیلاڤێ و گوندێ دتایسكێ دا دانایی ، ڤێجا لەشكرێ حكومەتا ئیراقێ دوو خالێن زێرەڤانیێ ل ئەوان هەردوو گرێن نێزیكی گوندێ سەرسیلاڤكێ دروست كربین و ب ڕۆژێ وەك زێرەڤانی ل جادا گشتی دگرن. ئەڤە ل هەیڤا ئێك یا سالا 1983ی ئەز و دگەل هەردوو هەڤالێن خۆە محەمەج تركی و جەمیل شەهباز ل سپێدەهەیكێ زوی بۆ یۆ پشتا گوندێ سەرسیلافكێ هاتین و مە بوسەیك د ئەوان خالێت زێرەڤانیێ دا دەینان ئەوێن لەشكرێ حكومەتا ئیراقێ دروستكرین. دگەل ڕۆژهەلاتنێ مە بەرێ خۆە دایێ هشت ئەسكەر بۆ ئەوان هەردوو خالێن زێرەڤانیێ هاتن و مە هەر سێ پێشمەرگەیان تەقە ل ئەوان لەشكران كرن و مە دیت سێ لەشکر هاتن كوشتن. بەلێ مە نەشیا قەستا سەر كەلەخێن ئەوان بكن و چەكێن ئەوان ڕاكین و ئەم بۆ پاشدا زڤڕین و مە قەستا گوندێ سەرسیلاڤێ كر. مە ل تەنشتا گوندی محەمەد تاهر سەرسیلاڤكی دیت و پرسیار ژمە كر و گوت: ئەڤە هوین ژ كیڤە دئێن. مە نەگوتێ: ئەم ژ ئەڤێ چالاكیێ دئێن مە گوتی: نوكە ئەم یێن ژ گوندێ مێرگەسورا دئێن و داكو تشتەكێ ژ ئەڤێ تەقەیێ ب زانین. محەمەد تاهر چ تشت نەگوتەمە. من بەرێ خوەدایێ خێزانا تەفیقی یا نانی دپێژت، هەما ئەز چەمهام و من دەستهاڤێت نانە گەرم ل سەر تەبكێ ڕاكر و ترسیی دا بەر لەقا و خوار. محەمەد تاهر كەنی و گوت: ئەڤە تە خێرە تو هندە برسی؟ من گوتێ: ئەم یێن ی ڕیكێ هاتین لەوما ئەم یێن برسی بوین. جارەكادیتر مە وەك پێشمەرگەیێن ڕێكخروا خەبات بۆ دەڤەرێ هاتین و مە بەردەوامی دا خزمەتا پێشمەرگایەتیێ كر.
ئەو بوو دەمێ لەشكرێ دەولەتا توركیا ل هەیڤا سێ سالا 1983ی بۆ سەر سنوری ئەو خەلكێ قەستا ناڤ ڕێزین شۆڕەشێ كرین و ل ناڤ ئەوان گەلیێن سەر سنوری ئاكنجی بین، خەلك نەچاربوون مالێن بۆ دەڤەرێ ڤەگوهێزن. ئەو بوو مالا برایێ من ئەحمەد بۆ گوندێ سپینداروكێ هات ڤەگوهاستن. هەر وەسا بارەگایێ لقێ ئێك بۆ سەر ڕویبارێ زی ل گوندێ زێوە شكان ئاكنجی بی و بارەگایێ لیژنا ناوچا زاخۆ بۆ چیایێ سپی ل گەلیێ هاروینا ئاكنجی بی. مە بەردەوامی دا خزمەتا پێشمەرگایەتیێ و چەند چالاكیێن هەڤپشك مە ئەنجامدان، ل بهارا سالا 1984ی من ل گوندێ سپینداروكێ هەڤژینی پێكئینا و پشتی بورینا سێ ڕۆژان كادرێ رێكخراوا مە یا خەبات كاك عەزەدین سەعدو گوتە من وەرە دێ بۆ دەڤەرا لیژنا ناوچا دهوكێ چین و دێ چالاكیەكا هەڤپشك ئەنجام دین. دەمێ جەولا مە یا هەڤپشك یا ڕێكخراوا خەبات و ڕیكخراوا شەهید شەهباز سالح و دگەل ڕێكخراوا شەهید شەعبان عەمەر ل سنورێ لیژنا ناوچا دهوكێ، بڕیار هاتەدان بۆ لێدانا ڕەبییا گرێ گوندێ كێڤلا ل پشتا باژێڕێ دهوكێ. پشتی ئەڤ ڕەبیا لەشکری هاتی بەرچاڤكرن و نەخشتە بۆ لێدانێ هاتیكرن. ڕۆژا لێدانا ئەڤێ رەبیێ ل بیرا من نینە بەلێ ل ناڤەڕاستا هەیڤا تەباخا سالا 1983ی بی. دگەل ڕۆژئاڤابونێ پێشمەرگەیی ژدوو لایانڤە بە چەكێ ئاربیجی و چەكێ ئەندازێ ل و دگەل چەكێ سڤك و مامناوەنی ل ئەڤێ ڕەبیا لەشكری دا. دشێم بێژم بۆ ماوەیەكی گەلەك كورت ئەڤ ڕەبیە ب زەند و باسكێن پێشمەرگەیی هات ڕاكرن، و چەندین چەك و تەقەمەنی بین دەستكەفتیێن پێشمەرگەیی. بەلێ ب مخابنی ڤە سێ پێشمەرگەیێن قەهرەمان و چاڤنەترس دئەڤێ چالاكیێ دا هاتن شەهیدكرن ئەوژی شەهید عەلی تەتەر پەرەخی پێشمەرگەیی ڕێكخراوا شەهید شەهباز سالح و شەهید كامل زەیتو شەرانشی پێشمەرگەیێ ڕیكخراوا شەهید شەهباز سالح د ئەڤێ چالاكیێ دا گیانێ خوە ژ دەستدان. هەر وەسا پێشمەرگەیەك دیتر یێ لیژنا ناوچا ئامێدیێ ب ناڤێ محەمەد ئەرزی ئەوژی د ئەڤێ چالاكیێ دا هات شەهید كرن. پێشمەرگەیێ ڕێكخراوا مە یا خەبات ب ناڤێ جەمیل شەهباز ب گرانی بریندابی. ئەو بوو جەنازێ شەهید عەلی تەتەر پەرەخی و شەهید محەمەد ئەرزی ل ناڤ گوڕستانا گوندێ زێوا شەفیق هاتن ڤەشارتن، و هەر وەسا جەنازێ شەهید كامل زەیتو شەرانشی مەسیحی ل ناڤ گورستانا گوندێ پیرەكا هات ڤەشارتن. مە ژە پێشمەرگەیێ هەڤالێ خۆە یێ بریندتر بۆ گوندێ برجینی ئینا وژلایێ نوشدارێن شۆڕەشێ ڤە چارەسەریا وی هات كرن.
ئەز مام دگەل هەڤالێ مە یێ بریندار هەتا چارەسەریا هاتی كرن و ئەم وەك بێهنڤەدان بۆ مالێ هاتن هنارتن.
