حەسرەت
مەتین وەرمێلی
چەند نێزیکتر دبوو، هند لێدانێن دلێ من زێدەتر دبوون، برویسکێن چاڤێن من ژی تیژتر د بوون، دا کو وێنەیێ جوانیا وێ بگرن. ل بەرامبەر هاتنا وێ، ئەز ببوومە پەیکەرەکێ بێ گیان، و بێدەنگیێ ئەز ب تمامی داگیرکربووم، ب زۆری من گوهــ ل دەنگێ ئاڤا دەڤێ خۆ د بوو، دەما قوریچک د بنێ گەوریا من دا چوویە خار.
ئەو بەژنا زراڤ، چاڤێن وەک شەڤێ ڕەش و دێمێ شرین، ب حەفت ئاوازان، ئەو لێڤ لڤاندن و سلاڤ کر، پشتی ل تەنشت من ڕوینشتیە خار. تەزینکەکا هێدی ب سەر لەشێ من دا چوو خار، لێ بەروڤاژی وێ، دەما من دەستێن وێ گرتین، گەرماتیا وان ڕوح زڤڕاندە دەمارێن من. من د خواست د ئەوێ دەرفەتێ دا ل بەر سینگێ خۆ ب گڤێشم، لێڤێن وێ یێن وەک هنگڤینی بدەمە بەر گەزێن ددانێن خۆ، ڕویێن وێ ب ماچان بەرزە بکەم، و شوینا دەڤێ خۆ ل سەر گەردەنا وێ بهێلم.
بەلێ شەرمێ ئەز ب تمامی داگیرکربووم، دەست و پێیێن من گرێدابوون و زمانێ من ل بەرامبەر وان هەمی داخوازیان لال ببوو. نە من دشیا چ ئاخڤتنا بێژم و نەژی چ پێنگاڤا بهاڤێژم، تنێ د ناڤبەرا خۆ و ئاگری دا دبوومە ئاڤ.
دەما بێهنا پرچا وێ گەهشتیە دفنێن من، وەک مەیڤەخۆرەکێ بێهۆش ئەز مەست بووم، ل وێرێ هەست و حەزێن من هێدی هێدی ل بەر پێیێن ئەڤینا وێ هاتنە سەرژێکرن. گڕنژینا وێ بوو ملحەم و دەرمان بۆ هەمی برینێن ل سالێن بۆری لسەر دلێ من ماین، و ب ئێکجاری ژ بیرا من برن. د وی دەمی دا، ئەز بوومە زارۆکەکێ بێ دەستهەلات، و دناڤ کویراتیا وێ حەسرەتێ دا مام.
چاڤێن مە دناڤ ئێک دا دگەڕیان، و بێدەنگیێ گرانیا خۆ ئێخستبوو سەر دەمژمێرێ. من د خواست دەم ل وێرێ بڕاوەستیت و جیهان هەمی د جهێ خۆ دا بمینیت، دا کو ئاڤاهیێ ڤێ دیدارێ چ جاران نەهەرفیت. بەلێ وەک هەردەم، چرکەیێن خۆشیێ بلەزن و خۆ ل مرۆڤی ناگرن، ئەوێ ب گڕنژینا دێمێ خۆ و ب گۆتنا ئاخفتنەکا کورت و شرین خاترا خۆ خواست، و هێدی دەستێن خۆ ژ ناڤ دەستێن من ئینانە دەر.
دەما ڕابووی دا بچیت، وەکی سیلاڤەکێ پرچا وێ ڕژیا سەر مل و ناڤتەنگا وێ، و جارەکا دی ل من زڤڕی، د ڤێ کورتەدیدارێ دا بتنێ شیام بێژمێ: «گەلەک حەز ژ تە دکەم». پشتی گوهلێبوونا ڤێ گۆتنێ، گڕنژینەک ب لێڤێن شرین یێن تژی شەرم پێشکێشی من کر و چوو سەر ڕێیا خۆ. ئەز ل وێرێ مام، ب تنێ دگەل گەرماتیا دەستێن وێ یێن هێشتا د ناڤ لەپێن من دا مایین، و بێهنا پرچا وێ یا دگەل هەوایی سەما دکر. ئەو ب پێنگاڤێن خۆ ژ من دویر دکەفت، بەلێ حەسرەتا چاڤێن وێ، بۆ هەتا هەتایێ د ناڤ لێدانێن دلێ من دا مان و دەرناکەڤن.
