خەلكێ كانی ماسێ دخوازن دەڤەرا وان نەبیتە مەیدانا شەرێ توركیا و پەكەكێ
ئەڤرۆ نیوز ، زنار تۆڤی:
ناحیا كانی ماسێ دەڤەرەكا هەڤسنورە ل گەل وەلاتێ توركیا، لەوما ب ئەگەرێ هەبوونا بارەگایێن پەكەكێ ل ڤێ دەڤەرێ، ب رەنگەكێ بەردەوام تۆپخانە و هێزێن ئەسمانی یێن سۆپایێ توركیا ڤێ دەڤەرێ بوردۆمان دكەن، خەلكێ ڤێ ناحیێ ژی ژ گەریانێن چیایی و سرۆشت و ئینانا گیایی بهاری و كار كرن دناڤا رەز و زەڤیێن خوە دا بێ بەهر بووینە، لەوما خەلكێ گەلەك گوندێن ڤێ دەڤەرێ د وەرزێن بهار و هەموو وەرزێن دیتر دا نەشێن بچنە سەر گوندێن خوە و دخوازن پەكەكێ دەڤەریا وان چۆل بكەت.
سەربەست سەبری ئاكرەیی رێڤەبەرێ ناحیا كانی ماسێ، بۆ ئەڤرۆ نیوز دیار كر: ناحیا كانی ماسێ دەڤەرەكا هەڤسنورە ل گەل وەلاتێ توركیا، لەوما رۆژانە و ب رەنگەكێ بەردەوام ب بەهانەیا چەكدارێن پەكەكێ گوندێن ڤێ دەڤەرێ ژ ئالیێ تۆپخانە و فرۆكێن توركیا ڤە دهێنە بوردومانكرن و ئەڤ دەڤەرە بوویە جهێ ململانا پەكەكێ و سۆیایێ توركیا و ڤێ چەندێ گەلەك زیان گەهاندیە خەلكێ ڤێ دەڤەرێ ب تایبەتی د ئالیێ چاندنێ دا، هەروەسا زیان گەهشتیە گەلەك زەڤی رەزێن وەلاتیێن ڤێ دەڤەرێ و هەتانوكە نەهاتنیە قەرەبۆكرن ژی، هەروەسا ژ ئەگەرێ وان شەر و ململانا هەتانوكە 14 گوندێن ڤێ دەڤەرێ هاتینە چۆلكرن و نوكە كەس ل وان گوندان ناژیت، هەروەسا نوكە 51 گوندێن ڤێ دەڤەرێ د ئاڤانە و خەلك لێ دژیت.
حەجی رەشید بێتكاری وەلاتیەكێ ناحیا كانی ماسێ یە، بۆ ئەڤرۆ نیوز دبێژیت: شەر و مململانا سۆپایێ توركی و پەكەكێ كارتێكرنەكا نەرێنی كریە سەر رەوشا ئێمناهیێ ل ڤێ دەڤەرێ، كو ئێدی خەلك نەشێن بچنە ناڤا زەڤی و ئاقارێن خوە سەخبێریا زەڤیێن خوە بكەن و نەشێن خوە ژ گوندێن خوە دوور بكەن، هەم ژ ترسا فرۆكێن شەركەر یێن سۆپایێ توركیا و دیسا ژ ترسا دەستێوەردانا چەكدارێن پەكەكێ دناڤا گوند و ئاقارێن خەلكێ دا، لەوما نوكە دەڤەرا بەرواری بالا یا بوویە مەیدانا شەری، هەروەسا ژ دەرئەنجامێ شەرێ پەكەكێ و توركیا دا زیان دگەهیتە خەلكێ هەژار و جۆتیارێن ڤێ دەڤەرێ.
حەجی زێدەتر دبێژیت: ئەم وەك خەلكێ ڤێ دەڤەرێ داخوازێ ژ هەردو ئالیان دكەین شەرێ خوە بێخنە د سنورێ وەلاتێ خوە دا و دەڤەرا مە نەكەنە مەیدانا شەرێ خوە، داكو خەلكێ مە ژی بشێن كاری دناڤا زەڤی رەزێن خوە دا بكەن و بچنە چیایان، چونكی ئێدی خەلكێ ڤێ دەڤەرێ تەحەمولا ڤی دۆخی ناكەت، هەروەسا هەكە رەوشا ناحیا كانی ماسێ ب ڤی دەستوداری یا بەردەوام بیت، ئەز یێ د وێ باوەریێ دا، كو ئەڤ سالێن بهێن پتریا وان خەلكێن ماینە ل سەر گوندێن خوە ژی، ئەو ژی دێ گوندێن خوە بەردەن و دێ گوندێن وان چۆل بن.