خەلکێ ئیرانێ باجا شەڕێ نها ددەت
چاڤدێرێن سیاسی دیار دکەن دەستهەلاتا نها یا ئیرانێ بەرهەڤ نینە ل گەل ئەمریکا دانوستاندنان بکەت و ل ئالیێ دی ئەمریکا ژی دڤێت دەستهەلاتا ئیرانێ خوە رادەست بکەت و بەردەوامیا شەڕی و ئالۆزیان وەسا کریە کو هەری زێدە زیان گەهشتیە خەلکێ ئیرانێ.
مەیسەم مورادێ بسپۆرێ کاروبارێن ئیرانێ دیار کر، سزایێن کو ڤێ دووماهیێ ئەمریکا ل سەر ئیرانێ سەپاندینە بوویە ئەگەر رەوشا ئابووری یا ئیرانێ گەلەک خراب بوویە، نها فەرمانبەر ل ئیرانێ نەشێن پێدڤیاتێن رۆژانە بۆ ژیانا خوە دابین بکەن، هەژاری رۆژ ب رۆژێ زێدەتر لێ دهێت و هەروەسا ژ بەر شەڕی گەلەک کارگەهێن کاری وێران بووینە و ب هزاران کەس بێکار ماینە و گۆت: (ژ بەر سەپاندنا سزایێن ئەمریکا نها ئیران نەشێت پەترۆلا خوە بفرۆشیت و نەشێت ب رێیا دەریایی کەلوپەلان ژی ژ دەرڤە بینیت و ژ بەر ڤان هەموو ئەگەران ژی نها رەوشا ئابووری یا ئیرانێ گەلەک خرابە و ئەو یەک ژی بێگومان کاریگەریا خوە ل سەر ژیانا هەموو وەلاتیان کریە).
ناڤهاتی ئەو یەک ژی دیار کر، دەستهەلاتا نها یا ئیرانێ کەفتیە دەستێ سوپایێ پاسداران و کەسێن توندرەو و وان ژی دڤێت شەڕ بەردەوام بیت، چونکی ئەو یەک د بەرژەوەندیا وان دایە، لێ زیانا هەری زێدە دگەهیتە وەلاتیێن ئیرانێ، هەموو تشت گران بووینە، کەلوپەل د بازاران دا نینن، پارێ ئیرانێ رۆژ ب رۆژێ بهایێ خوە ژ دەست ددەت و ئەو یەک ژی وەسا کریە خەلکێ ئیرانێ ژ دەستهەلاتێ توورە بن و گۆت: (ئەمریکا چاڤەرێی ڤێ یەکێ یە دا کو خەلک ل ئیرانێ ل دژی دەستهەلاتێ دەست ب خوەنیشادانان بکەن، چونکی بەری نها ژی ترامپی دیار کربوو وان یا پێدڤی کرینە و دڤێت خەلک ژی ل دژی دەستهەلاتێ رابن، چونکی بەرپرسێن نها یێن ئیرانێ تاوانبارن و دەستێ وان د کوشتنا پتر ژ ٥٠ هزار وەلاتیێن سڤیل دا هەیە و دڤێت بەرپرسێن ئیرانێ ل دادگەها تاوانان بهێنە دادگەهکرن).
د. ئەردەشیر پشەنگ بسپۆرێ کاروبارێ سیاسی ژی دیار کر، خەلکێ ئیرانێ ل دژی شەڕی نە، چونکی رەوشا خەلکی گەلەک خرابە، خەلکێ ئیرانێ داخواز دکەت کو دەستهەلاتا نها یا ئیرانێ ب رێیا دانوستاندنان هەموو پرسێن هەی ل گەل ئەمریکا چارەسەر بکەت، لێ مخابن هەتا نها تشتەک وەسا نەهاتیە کرن و شەڕ و ئالۆزی ژی بەردەوامن، ژ بەر شەڕی و سزایێن ئەمریکا ژی زیانێن گەلەک مەزن گەهشتینە خەلکی و د راستی دا مرۆڤ دشێت بێژیت کو نها خەلکێ ئیرانێ باجا شەڕێ ئیرانێ و ئەمریکا ددەن و گۆت: (وەسا دیارە کو ئیران ب چو رەنگەکێ داخوازیێن ئەمریکا قەبوول ناکەت و د ل ئالیێ دی ترامپ ژی یێ هەموو رێیان بکار دئینیت دا ئیران خوە رادەست بکەت، ژ بەر ڤێ یەکێ ژی هەتا نها هەر دو ئالیان نەشیاینە ب رێیا دانوستاندنان پرسێن هەی چارەسەر بکەن و نها د ناڤ بەرپرسێن ئیرانێ دا نێرینەکا وەسا هەیە کو رێککەفتن ل گەل ئەمریکا د بەرژەوەندیا ئیرانێ دا نینە و نابیت ئیران مەرجێن ئەمریکا قەبوول بکەت و ئەمریکا ژی هەموو رێیەکێ ل دژی ئیرانێ بکار دئینیت).
بسپۆرێ کاروبارێن سیاسی ئەو یەک ژی دیار کر، ژ بەر سزایێن ڤێ دووماهیێ رەوشا خەلکی گەلەک خراب بوویە، نها فەرمانبەر ل ئیرانێ بووینە تەخا هەژاران و هەروەسا ژ بەر رەوشا خراب یا ئابووری گەلەک ئاریشەیێن دی ژی پەیدا بووینە، ب گشتی رەوش گەلەک خرابە و هەکە وەسا بەردەوام بیت دێ ئیران تووشی کارەساتێن گەلەک مەزن بیت و نها خەلک ژ رەوشا هەی گەلەک دلگرانن و نازانن کا دێ پاشەرۆژا وان چاوا بیت.
ل ئالیێ دی گەلەک ژ چاڤدێرێن سیاسی ل ئیرانێ و دەرڤە وەسا دبینن کو ژ بەر سزایێن ڤێ دووماهیێ رەوشا ئیرانێ گەلەک خراب بوویە، ئیرانێ دڤێت شەڕ بەردەوام بیت، چونکی بەردەوامیا شەڕی بۆ دەستهەلاتێ گەلەک باشە لێ ژ بۆ خەلکێ ئیرانێ گەلەک خرابە، هەکە دۆرپێچا دەریای یا ل سەر ئیرانێ بۆ دەمەکێ دی ژی بەردەوام بیت دێ رەوش گەلەک خرابتر لێ هێت، چونکی دەمەکە ئیران نەشێت پەترۆلا خوە بفرۆشیت.
رۆژنامەیا واشنتۆن پۆست ژی د راپۆرتەکێ دا دوهی دیار کر، سزایێن ڤێ دووماهیێ ئەمریکا ل سەر ئیرانێ سەپاندی شیا د دەمەکێ گەلەک نێزیک دا ئەنجامێن خوە یێن باش بۆ ئەمریکا هەبن، چونکی ب سالانە ئەمریکا هەر ئیرانێ سزا ددەت لێ سزایێن ڤێ دووماهیێ شیا رەوشا ئیرانێ تێک بدەت و هەکە ئەمریکا بەردەوامیێ بدەتە دۆرپێچا دەریایی و سزایێن ڤێ دووماهیێ ژی بەردەوام بن وی دەمی دێ ئیران نەچار بیت یان بەردەوامیێ بدەتە شەڕی یان ژی هەموو مەرجێن ئەمریکا قەبوول بکەت، بەردەوامیا شەڕی ژی دێ بیتە ئەگەر د ناڤ ئیرانێ دا خەلک دەست ب خوەنیشادانان بکەن، دەمەکە ترامپ چاڤەرێیە خەلکێ ئیرانێ ل دژی دەستهەلاتێ دەست ب خوەنیشادانان بکەن، چونکی دەستهەلاتا ئیرانێ هەتا نها مەرجێن ئەمریکا قەبوول نەکرینە و ترامپ ژی هەموو رێیان ل دژی ئیرانێ بکار دئینیت.
