خەون و تابلۆ
هەژین فەرەج
شەڤەكا وەسا خاڤ و سست بوو، وەك بێزارییا گیانێن ماندی. شەمالكەك ل ژۆرێ بوو، رۆناهییا خوە ددا سەر دیواری. ئەز ل سەر کورسییەكا پلاستیكی ل بەر پەنجەرەیێ ڕوونشتی بووم، چاڤێن من ژ وێ تابلۆیا کەڤن یا ب دیواری ڤە هەلاویستی ڤەنەدبوون. نە تابلۆیەكا وەسا بوو كو تو بێژی سەرنجڕاكیشە، بەلكو من ژ (بازارێ ئەینیێ) ب هزارەكێ كری بوو، و دبیت چونكی من ب هزارەكێ كری بوو لەو ئەز هۆسا بێ بها دبینم!
ب تنێ خەونەكێ ئەز ب شێوەیەكێ ئاگەهداركرم كو ئەڤ تابلۆیە نە نورمالە!
دەمەك گەلەك درێژ دەرباز بوو، و دبیت نە گەلەك درێژ بیت؛ بەلكو من هەست پێ نەكربیت، لێ ئەگەر من هەست پێنەكربیت یا ڕەوا دەمەك درێژ بیت. من تەماشایی دەمژمێرێ نەكر دا ب دروستی بزانم، چونكی پشتی من ئەو تابلۆ ئینا، من ل جهێ دەمژمێرێ دیوارهەولایست.. دەمژمێر ژی من كرە دناڤ خەرگێلا دبن دەرەجكاڤە… هندی كەیفا من ب وێ تابلۆیێ هاتبوو من جهەكێ سەنتەر ل سەر دیواری دڤیا كو لێ ب هەلاویسم.. ژ هینگێ وەرە ژۆر بێ دەمژمێرە و ئەز ب شەڤ هەست ب دەمی ناكەم.
دناڤبەرا شەڤا كڕینا تابلۆی و ڕاكرنا دەمژمێرا دیواری دا، ئەز جارەكادی كەفتم دناڤ كێلەشۆكا ژیانێ دا.. هزرەك چوو و هزەرك هات… دووماهیێ تشتەك تژی ناخێ من بوون؛ نە خەم بوو، نە ژی كەیف و شادی بوو. دبیت ئەو بێدەنگیا دەروونی بوو یا کو مێشک تێدا ژ ناکۆکییا ڕۆژانە دڕەڤیت. د وێ گاڤێ دا تەماشەكرنا تابلۆیێ هلدا و ئازراند و ڤەمراند ڤە. من هزر کر: ئەرێ ئەڤە چەند سالن ئەز دگەل ڤان برینێن خۆ دژیم؟ بۆچی من ئەڤ باوەرییە دایە خۆ کو قوربانیبوون تەنێ ڕێکا مانێ یە؟
جڤاکێ دەوروبەرا من یێ فێربووی کو مرۆڤێ ب ژان، بلا ب ژان بژیت. لێ ئەز د وێ خۆلەکێ دا گەهشتم دەرئەنجامەكێ کو پێشتر چ جاران نەهزرکری بوو: برین نە بنسترا ژیانێ یە، بەلکو رێكەكە مرۆڤ تێدا دەرباز دبیت.
من پەنجەرە ڤەکر. بایەكێ هوینێ نازك و نەرم یێ شەڤێ، یێ تێكەل دگەل بێهنا ئاخێ كو بارانەكا هویر تەڕ كری، هاتە ژۆرێ. وێ ژۆرێ، ب بێ دەنگییا خۆ، ڕەنگەک نوی ددا وەك ڤەگێڕانا ژیانێ و سیمایێن وێ تابلۆیا ئەز حەز ژ ژێ دكەم و چ ژ ڕامانا وێ نزانم. من د وێ گاڤێ دا هەست كر كو ئەز نە ئەو کەسەمە یێ کو خۆ دوبارە دكەت؛ ئەز ئەو کەسەمە یێ کو دڤێت واتایەكا نوی بدەتە هەبوونا خۆ ئەگەر خۆ تشتێ حەزژێكری ژی دانا لبەر ژدەستدانێ.
دگەل ئێكەمین تیرۆژكێن ڕۆژێ، پشتی من كارێ خۆ كری، ئەز بەرەف بارەگایێ گشتی یێ بازرگانییا بەرهەمێن داهێنەر چووم و تابلۆیێ من ددەستێ مندا بوو.
من دگەل خۆ دگۆت: پا ئەگەر دەركەت دەگمەن و گرانبها.. چەوایە!
ئەڤە سێ ڕۆژە تكتكا دەمژمێرا دیواری یا دهێت ڤە، پشتی من جارەكا دی ب دیواری ڤە هەلاویستی و تابلۆ دگەل كۆمەكا تابلۆیێن دی ل پێشانگەها بازارێ شێوەكارێن جیهانێ ل باژێرێ (دوبەی) پشكدارە.
نوكە سەعەت سێ و سێزدە خۆلەكە و ئەز یێ ل سەر كورسیكێ ل بەر پەنجەرێ روونشتی مە و پەرتووكا (دەلیڤەیا ژ دەست نەدە) دخوینم و دەنگێ تكتكا سەعەتا دیواری پتر تامێ ددەت خواندنێ و بیرا من ل تابلۆیێ دئینیتەڤە.
