داخوازا سزادانا ئەڤی نوژداری دھێتەکرن
ئەڤرو نیوز ، نەوزاد ھلۆری:
نوژدارەکێ پێخەمەت دیارکرنا تابلو و ریکلاما کلینیکا خوە ب مشاری دارەکا مەزن بری ، و رێکخراوێن ژینگەھی دیاردکەن کو ئەڤ نوژدارە دڤێت بھێتە سزادان.
ئاسوو شکاک سەرۆکێ رێکخراوا ئاڤیار بو ھوشیاریا ژینگەی بۆ ئەڤرو نیوز گۆت: (نوژدارەکێ ئێک ژ دەڤەرێن کوردستانێ پێخەمەت دیارکرنا تابلو و ریکلاما کلینیکا خوەرابوویە ب برینا دارەکا مەزن ب مشاری کو ئەڤ یەک ژی دژی بنەمایێن ژینگەھی یە و ل گەل پێشە و رەوشتێ نوژداری ناگونجیت)
زێدەتر گۆت: (ئەم وەکو رێکخراوا ئاڤیار و لایەنێن شولەژێ ل حکومەتێ دوڤچونەکا جدی لسەر بابەتی دکەین و داخوازێ ل ھەر کەسکێ دکەین ئەگەر بزانیت ئەڤ نوژدارە دکەڤیت کیرا کوردستانێ بلا مە ئاگەھدار بکەت داکو ل گورەی قانونێ ئەڤ نوژدارە بھێتە سزادان کو ئەو ژی چاندنا دارەکا وەکو وێ مەزنە یان ژی چەند دارەکایە ل گەل قەرەبوکرنا ئەوان کرێکارێن ئەڤ دارە چاندنی)
سەرۆکێ رێکخراوا ناڤبری دیارکر ژی کو ئەو گەھشتینە ئەنجامەکێ کو ئەڤ نوژدارە ل ھەرێما کوردستانێ یە و گۆت ژی: (ب ئانەھیا خودێ ل دەمەک نێزیک دێ گەھینە ئەنجامێن دوماھیێ و دیارکرنا ناڤ و نیشانێن ئەوی نوژداری و سزادانا وی داکو بو کەسەکێ دن نەبیتە جھێ چاڤلێکرنێ )
