داخوازیێن جۆتیاران بۆ دابینكرنا كارەبێ د دەمێ ئاڤدانێ دا هاتینە بەرچاڤ وەرگرتن
دلۆڤان ئاكرەیی:
رێڤەبەرێ گشتیێ كارەبا پارێزگەها دهۆكێ دیاركر، ل دەستپێكا وەرزێ چاندنێ، داخوازیێن جۆتیاران هاتینە بەرچاڤ وەرگرتن بۆ دابینكرنا كارەبێ د دەمێن پێدڤی دا ب تایبەت د دەمێ ئاڤدانێ دا و هەتا نوكە پرۆسە ب باشی برێڤەچوویە و هندەك جاران كێشەیێن تەكنیكی یێن ژ دەرڤەی كۆنترۆلا وان چێدبن، بەلێ د ماوەیەكێ كورت دا دهێنە چارەسەركرن و داخوازیێن وان دهێنە بجهئینان.
حازم مەحەمەد، رێڤەبەرێ گشتیێ كارەبا پارێزگەها دهۆكێ بۆ رۆژنامەیا ئەڤرۆ گۆت: پرۆژەیێ رۆناهی ل سەر چەندین قەزایان هاتیە بجهئینان و یێن دی ژی د قۆناغا بەرهەڤیێ دانە، وەك قەزا (دهۆك دگەل گوند و ناحیێن وێ، قەزا سێمێل، قەزا ئاكرێ و پشكەك ژ قەزا ئامێدیێ) و ئەو قەزایێن د قۆناغا بەرهەڤیێ دانە د نێزیك دا دێ مفادار بن ژ پرۆژەیێ رۆناهی و ئەو قەزایێن مایی ژی وەك پشكەكا قەزا (ئامێدیێ، قەزا شێخان و قەزا بەردەڕەش) هەمی بەرهەڤی بۆ هاتینە كرن و د دەمەكێ نێزیك دا ئەو ژی دێ ب تەمامی بنە خودان كارەبا ٢٤ دەمژمێری.
ل دۆر دانانا میكانزمەكی بۆ قەرەبووكرنا وەلاتیان و مافێ پشكدارێن ڤی پرۆژەی دیار كر: دوو جۆرێن قەرەبووكرنێ هەنە، وەك قەرێ د دەمێ پرۆژەیێ رۆناهی دا كو ئەو كێشە و قەرێن د چارچۆڤێ پرۆژێ نوو یێ سیستەمێ زیرەك (رۆناهی) دا دروست دبن و قەرێن كەڤن: ئەو قەرێن ژ دەرڤەی پرۆژەی یان یێن پێشتر ل سەر وەلاتیان كۆمبووین و پێشەنگی و ئەولەویەت بۆ وان پشكدارانە یێن كو د ناڤ سیستەمێ رۆناهی دانە، و پاشان دێ بۆ قەرێن كەڤن ژی چن، و ل دوماهیێ هەر كەسەك دێ مافێ خۆ یێ قەرەبووكرنێ وەرگریت.
سەبارەت ب كێشەیێن تەكنیكی ئاشكراكر: هەر سیستەمەكێ نوو یێ تەكنیكی بهێتە دانان، دێ هندەك كێشە یان شاشی د دەستپێكێ دا بۆ چێبن، كو ئەڤ چەندە یا پێشبینیكری یە و د نوكە دا د سیستەمێ كارەبا هەرێما كوردستانێ دا پتر ژ ١ ملیۆن و ٩٠٠ هزار پشكدار هەنە، ژبەر ڤێ چەندێ، سروشتی یە كو د ناڤ ڤێ ژمارەیا مەزن دا هندەك پشكدار تووشی كێشەیان ببن یان ناڤێن وان ب دروستی نەكەڤنە د سیستەمی دا، بەلێ تیمەكێ خەمخۆر و بەردەوام ل سەر ڤی بابەتی كار دكەت و هویربینیێ دكەن، و ئەگەر هەر كەسەك مفادار نەببیت یان كێشەیەك بۆ دروست ببیت، دێ هەول دەن سیستەمی بۆ ڤەگەرینن داكو ئەو ژی ب شێوەیەكێ دادپەروەرانە مفادار ببیت.
سەبارەت كاریگەرییا سەقایی (كەشوهەوا) دیار كر، كەشوهەوایێ دەڤەرێ ژی كاریگەری یا ل سەر كێم و زێدەبوونا مەزاختن و تێچوویێ كارەبێ هەیە، كو ئەڤە ژی ژ كلیلێن سەرەكی یە د گۆڕانكاریا رێژەیان دا.
