داعش بزاڤا گوهۆڕينا قورئانێ و دانانا ئالايێ خوه ل سه‌ر دكه‌ت
ژێده‌ره‌كێ باوه‌ر پێكريێ ئاگه‌هدار ژ ناڤ باژێرێ مووسل بۆ ئه‌ڤرۆ دياركر كو بارودۆخێ باژێرێ مووسل نه‌يێ ئارامه و تيرۆرستێن داعش بزاڤا گوهۆرينا هه‌موو تشته‌كي ل وي باژێري كريه هه‌تاكو وان ل به‌ره قورئانێ ژي ب گوهۆرن و ئالايێ خوه ژي دانايه سه‌ر، ئاماژه دا ژي كو چه‌كدارێن داعش باره‌گايێن خوه ل لايێ چه‌پێ يێ مووسل يێن گرتين و چه‌كدار و ترۆمبێلێن وان ژي نه‌ماينه.
ئه‌ڤرۆ: پتريا چه‌كدارێن داعش ل مووسل كينه و ژ كيرێ هاتينه؟
ده‌مێ داعش مووسل كونترۆلكري، پتريا چه‌كدارێن وێ بياني بوون، لێ پشتي شانێن نڤستي يێن داعش ل مووسل دياربووين، نوكه پتريا چه‌كدارێن داعش ژ ئه‌ندامێن وان شانانه ل گه‌ل وان كه‌سێن ژ نوو گه‌هشتينه رێزێن وان، لێ پتريا چه‌كێ گران ئه‌وێ كه‌فتيه ده‌ستێ داعش ژ سه‌ربازگه‌هێن عيراقێ، يێ هاتيه هنارتن بۆ سووريێ ل گه‌ل چه‌كدارێن بياني و عه‌ره‌ب و دشێم بێژم نۆكه چو چه‌كدارێن بياني يێن داعش نه‌ماينه و ئه‌وا نۆكه ژي روودده‌ت و هه‌ي ب تنێ راگه‌هاندنه و د ئێكه‌مين هێرش دا ل سه‌ر مووسل دێ هێته هه‌لوه‌شاندن ب تايبه‌تي ئه‌و دربێن مه‌زن ئه‌وێن ب داعش كه‌فتين ل سه‌ر ده‌ستێ پێشمه‌رگه‌ي ل ده‌شتا نه‌ينه‌وا و له‌شكرێ عيراقێ ل ئامرلي، ئه‌و رێكخستيه يا لاواز كري.
ئه‌ڤرۆ: نوكه مووسل د چ ره‌وش دايه؟
ژ دوهي وه‌ره مووسل و ب تايبه‌تي هه‌موو لايێ چه‌پێ ژ باژێري يێ ڤالا بووي ژ چه‌كدارێن داعش و باره‌گايێن خوه يێن چۆلكرين ژ كه‌لوپه‌ل و كه‌سان ژي و چه‌كدارێن وان و ترۆمبێلێن وان ژي ئێكجاري ل جادێن مووسل نه‌ماينه و تنێ هنده‌ك چه‌كدارێن وان يێن (پۆليسێن ئيسلامي) ل لايێ راستي يێ مووسل دهێنه ديتن كو ژيێ وان د ناڤبه‌را 16 هه‌تا 18 ساليێ دايه و دهێته گوتن يێن به‌ر ب سووريێ چووين، لێ ب راستي ئه‌ز نزانم كا هه‌موو چووينه سووريێ، يان ژي ئه‌ڤه پلانه‌كا وانه.
ئه‌ڤرۆ: ترس د ناڤ وه‌لاتيێن مووسل دا هه‌يه؟
چه‌ندين پێلێن نه ئاسايي ب باژێرێ مووسل كه‌فتينه ژ رۆژا كونترۆلكرنا وي ژ لايێ تيرۆرستێن داعش ڤه، كو ده‌ستپێكا وان پێلان گرفتا ئه‌مني يا پري ئالۆزي و ده‌ربه‌ده‌ركرنا چه‌ندين پێكهاتێن وي باژێرێ و پارێزگه‌ها نه‌ينه‌وا ب گشتي وه‌كو ئێزدي و مه‌سيحي و شه‌به‌كان و دووماهيا وان پێلان ژي هه‌بوونا ترسێ ژ په‌يدابوونا گرفت و كاره‌ساتێن مرۆڤايه‌تي ل مووسل ده‌ما شه‌ر دگه‌هيته ناڤ باژێري.
ئه‌ڤرۆ: وه‌لاتيێن مووسل ب شێوه‌كێ به‌ربه‌لاڤ گه‌هشتينه رێزێن داعش؟
راگه‌هاندنا رێكخستيا داعش يا تيرۆرستي به‌رده‌وام هانا گه‌نجێن مووسل دده‌ت بۆ شه‌ركرنێ ل گه‌ل پێكهاتێن عيراقي و ب رێيا راديۆيێن خوه و خالێن راگه‌هاندنێ ئه‌وێن ل جادێن مووسل داناين، شيايه چه‌ندين سنێله و بێ كاران بۆ لايێ خوه ڤه‌كێشن و نوكه داعش بزاڤا گوهۆرينا هه‌موو تشته‌كي ل مووسل دكه‌ت. ل ده‌ستپێكێ پشته‌ڤان بۆ داعش هه‌بوون، لێ ئه‌وێن گه‌هشتينه رێزێن وێ رێكخستيێ پتريا وان خه‌لكێ گوندێن ده‌وروبه‌رێ مووسل و يێن ده‌ڤه‌را جه‌زيره نه ، د هه‌مان ده‌م دا ژي نوكه هنده‌ك عه‌شيره‌ت يێن هه‌ين كو د به‌رهه‌ڤن پشته‌ڤانيا له‌شكري بكه‌ن ل ده‌مێ رزگاركرنا مووسل وه‌كو عه‌شيره‌تێن عوبه‌يد و جبور .
ئه‌ڤرۆ: ئانكو نوكه بێزاريه‌ك ل ده‌ڤ خه‌لكێ مووسل په‌يدابوويه به‌رامبه‌ر داعش؟
ل ده‌ستپێكێ داعش پشته‌ڤان هه‌بوون ژ حزبا به‌عس يا ژناڤچوي و بزاڤا نه‌قشبه‌ندي و چه‌ندين گرۆپێن دي و ژ وان ژي ئه‌سيل نجێفي كو وي ب خوه گوتيه (داعش دێ يا دلوڤانتر بيت ژ له‌شكري و سه‌فه‌ويان ل گه‌ل وه‌لاتيێن مووسل)..” لێ بوچوونا وه‌لاتيێن مووسل ل سه‌ر داعش يا هاتيه گوهۆرين ب تايبه‌تي پشتي به‌رژه‌وه‌نديێن ئاليان هه‌ڤدژ بووين و داعش خواستي پاري بۆ وێ ب تنێ بيت، د هه‌مان ده‌م دا داعش گڤاشتن ل سه‌ر وه‌لاتيێن ساده زێده‌تر لێكر ب رێيا ده‌ركرنا (په‌يمانا باژێري) و چه‌ندين قانوونێن دي، زێده‌باري وێ چه‌ندێ ژي، دياردا بێكاريێ و نه‌بوونا ده‌ليڤێن كاري د بن سيبه‌را حوكمرانيا داعش دا، بوويه ئه‌گه‌رێ بێزاربوونا وه‌لاتێن مووسل ژ داعش.
ئه‌ڤرۆ: بارێ خزمه‌تگوزاريێ ل مووسل يێ چاوايه ل بن حوكمرانيا داعش دا؟
پتريا خزمه‌تگوزاريان نينن و هه‌ر دو رۆژان ب تنێ دو ده‌مژمێران كاره‌ب يا هه‌ي و ئاڤ هه‌تا نوكه يا باشه، لێ وه‌لاتي ژ نه‌بوونا كه‌ره‌ستێ كلۆرێ يێ پاقژكرنا ئاڤێ د عومباران دا د ترسن ، ديسا گرفتێن مرۆڤايه‌تي ل مووسل يێن به‌ر ب زێده‌بوونێ ڤه دچن و ترسا په‌يدابوونا كاره‌ساته‌كا مرۆڤايه‌تي ل مووسل يا هه‌ي، كه‌لوپه‌لێن خوارنێ يێن به‌ر ب نه‌بوونێ دچن و ده‌رمان ژي ل نه‌خوه‌شخانان دكێمن و كارێ بازرگاني و ئابوري به‌ر ب نه‌مانێ ڤه دچيت و ژبير نه‌كه‌ن ژي داعش ده‌ستێ خوه يێ دانايه سه‌ر مليارێن ديناران د بانكێن مووسل دا ب بهانه‌يا وێ چه‌ندێ كو خودانێن وان پارێن خوه يێن كرينه د وان بانكان دا به‌رامبه‌ري مفايه‌كێ سالانه و ئه‌ڤه ژي ل دووڤ داعش ريبا و حه‌رامه.
ئه‌ڤرۆ: خوتبێن ئه‌ينيێ يێن مزگه‌فتێن مووسل د ڤێ قۆناغێ دا به‌ر ب چ ئاراسته دچن؟
نۆكه هه‌موو خوتبه‌خوين بزاڤا خوه دووركرنێ ژ به‌حس و په‌سنا داعش دكه‌ن و يێن بۆ خوه ل رێيه‌كێ د گه‌رهن بۆ زڤرينێ ده‌مێ مووسل دهێته رزگاركرن ژ داعش و ئه‌ڤ چه‌نده ل هنده‌ك مزگه‌فتان يا ده‌ستپێكري ژي كو خوتبه‌خوينان نيگه‌رانيا خوه ژ پێرابوونێن داعش دياركر و داخواز ژێ كر كو ره‌فتارێن خوه باش بكه‌ن ل گه‌ل وه‌لاتيان.
ئه‌ڤرۆ: وره‌يێن تيرۆرستێن داعش ل مووسل د چ ئاست دانه ب تايبه‌تي پشتي پێشمه‌رگه‌ي ده‌ست ب هێرشێن خوه كري و سكرێ مووسل و زومار و چه‌ندين ده‌ڤه‌رێن دي ژ ده‌ستێ داعش رزگار كرين؟
له‌شكرێ عيراقێ و پێشمه‌رگه يێن بزاڤا كونترۆلكرنا باده‌كا ئه‌مني دكه‌ن ب هاريكاريا له‌شكرێ ئه‌مريكي و فرۆكێن وي، لێ دوپات دكه‌م كو پتريا چه‌كدارێن داعش نۆكه سنێله‌نه و ترس ل سه‌رۆچاڤێن وان يا دياره.
ئه‌ڤرۆ: داموده‌زگه‌هێن حوكمه‌تێ ل مووسل ده‌وامێ دكه‌ن يان نه، ب تايبه‌تي ئه‌سيل نجێفي پارێزگه‌رێ نه‌ينه‌وا برياره‌ك ده‌ركربوو كو هه‌ر فه‌رمانبه‌ره‌كێ ده‌وامێ بكه‌ت دێ هێته لادان ژ كاري؟
ده‌رگه‌هێن هه‌موو رێڤه‌به‌ري و داموده‌زگه‌هێن حوكمه‌تي ل مووسل د گرتينه و چو فه‌رمانبه‌ر ده‌وامێ ناكه‌ن ژ بلي ساخله‌ميێ و باژێرڤانيێ و بريارا پارێزگه‌رێ نه‌ينه‌وا ژ فه‌رمانبه‌رێن وان هه‌ردو رێڤه‌به‌ريان ناگريت و فه‌رمانبه‌رێن مووسل دچنه كه‌ركووكێ بۆ وه‌رگرتنا مووچێن خوه.
ئه‌ڤرۆ: سالا نوو يا خواندنێ ل قوتابخانه و په‌يمانگه‌ه و زانكۆيێن مووسل دێ ل ده‌مێ خوه هێته ڤه‌كرن؟ و ئايا داعش گوهۆڕين د پرۆگرامێن خواندنێ دا كرينه؟
حوكمه‌تا عيراقي د برياره‌كا خوه دا كو ل ڤێ دووماهيێ ده‌ركري ب شێوه‌كێ فه‌رمي ده‌وام يا راوه‌ستاندي ل مووسل و هه‌تا نۆكه داعش چو تێبيني يان بريارێن هه‌ڤدژ ل سه‌ر وێ بريارێ نه‌بوون، ژبه‌ر كو يا مژووله ب به‌رۆكێن شه‌ري ڤه و ئه‌ڤێ چه‌ندێ ژي كاروبارێن ناڤخوه‌يي يێن مووسل ژ بيرا وێ برينه و نه‌بوونا شيانان ل ده‌ڤ داعش بۆ ب رێڤه‌برنا مووسل، ئه‌و رێكخستيه دووركريه ژ ده‌ركرنا بريارێن ب ڤي شێوه‌ي. لێ هه‌تا نۆكه تنێ كوليژێن (هونه‌رێن جوان، قانوون و ئاداب) يێن هه‌لوه‌شاندين، ديسا قورئان ژي يا گوهۆري و بزاڤا چاپكرنا دانه‌يێن نوو ژ قورئانێ دكه‌ن كو ئالايێ داعش ل سه‌ر بيت.
