داعش و ئاواران نه‌هێلا رۆژا زارۆيان ل دهۆكێ بهێته ساخكرن
ئه‌ڤرۆ نيوز، ناجی به‌ده‌ل:
رۆژا جيهانيا زارۆيان بۆ ئه‌ڤ ساله ل دهۆك نه‌هاته ساخكرن و رێڤه‌به‌ريا ره‌وشه‌نبيريا زارۆيان ل دهۆكێ ژى راگه‌هاند كو ره‌وش ئه‌ڤ ساله يا ئالۆز بوو و هه‌موو زێده‌تر مژوولى داعش و هاتنا ئاواران بوون.
عايشا شه‌وكه‌ت رێڤه‌به‌را رێڤه‌به‌ريا ره‌وشه‌نبيريا زارۆيان ل پارێزگه‌ها دهۆكێ بۆ ئه‌ڤرۆ نیوز راگه‌هاند كو ل ده‌هـ سالێن بۆری هه‌موو سازی و ریكخراوێن تایبه‌تمه‌ند كار كر بۆ وێ چه‌ندێ مافێ زارۆی دابین بكه‌ن، مافێ زارۆی بۆ زارۆی و بۆ جڤاكێ بده‌نه خویاكرن.
ریڤه‌به‌را ناڤبری دیاركر ژی كو كار هاته كرن دا بشێن زووتر هشیاریێ بۆ زارۆی په‌یدا بكه‌ن و گۆت: “هه‌كه بۆ ئه‌ڤ ساله وه‌كو هه‌لكه‌فت چ نه‌هاتبيته كرن، دبيت ژ به‌ر ره‌وشا نوكه يا هه‌رێمێ و هاتنا داعش بيت”.
عايشا خانێ گۆتژی: “سازيێن په‌يوه‌نديدار مژوولى ره‌وشا هاتنا زوورا كوچبه‌ران ل دهۆكێ بوون و زارۆيێ پارێزگه‌ها دهۆكێ بێ بار بوویه ژ گه‌له‌ك چالاكیان و چ بۆ نه‌هاتیه‌كرن و نه‌شیاینه وه‌كو پێدڤی خزمه‌تا وى بكه‌ن”.
ئه‌و چه‌نده ژی دیاركر كو جهـ گرتنا زارۆيان ل پلانا دو سالی یا پارێزگه‌هێ نه‌هاتیه دیتن و نه‌هاتینه ئاگه‌هداركرن ل سه‌ر ئه‌وێ پرسێ وه‌ك رێڤه‌به‌رايه‌تی و پتر گرنگی ب هنده‌ك تشتێن خزمه‌تا گشتی دایه و ئه‌ولیه‌ت بۆ ئارامی و دابینكرنا جهی بۆ ئاواران بوويه.
20\11\1959 وه‌كو رۆژا جيهانى يا زارۆيان ل نه‌ته‌وێن ئێكگرتى دهێته هژمارتن و ل دهۆكێ ب ڤێ هه‌لكه‌فتێ چو چالاكى نه‌هاتنه كرن و ئه‌ڤ رۆژه نه‌هاته ساخكرن.
