دانا قستێن ترۆمبێلان ب رێیا دادگەھێ یێن چارە دبن
ئه‌ڤرۆ:
وەلاتیەکی ترومبێلەک ژ کەسەکێ کری پشکەکا بچیک یا پارێ وی دایێ و یێن دیتر ھێلان ھەتا کو ئەو ژی وێ ترومبێلێ ب فروشیت و قازانجێ وێ وەربگریت پاشان پارێن مایێ ب دەتێ، چوو پێشانگەھەکێ ئەو ترومبێل ب بھایەکێ کێمتر ژ بھایێ وێ یێ بەرێ فرۆت و گرێبەست چێکر و گۆتێ د ماوێ ھەیڤەکێ دا دێ ڤەگۆھێزمە سەر ناڤێ تە، پشتی پارێن خوە وەرگرتین خوە بەرزەکر ئانکو فێلکاری ل دو کەسان کر.
پارێزەر رەخشان رەشید ئامێدی ل دادگەھا دھۆکێ بۆ ئەڤرۆ دیارکر کو وەلاتیەکی ترومبێلەک ژ کەسەکی کری ب 15 ھزار دولاران و گۆت: ل دەسپێکێ پێنج ھزار دولار دانێ و یێن دیتر ھێلان گۆتێ ھەتا ئەز ژی ڤێ ترومبێلێ دفروشم پاشی دێ دەمە تە دا ئەز ژی قازانجێ ژێ بکەم، وی ژی ترومبێل و سالناما وێ رادەستی وی کەسی کرن، بکرێ وێ ترومبێلێ چوو پێشانگەھەکێ و ئەو ترومبێل فروتە کەسەکێ دیتر ب کوژمێ 12 ھزار دولاران ئانکو ب سێ ھزار دولاران کێمتر ژ بھایێ وێ و پارێن ترومبێلێ وەرگرتن و گرێبەستا پێشانگەھێ چێکر و گۆتێ د ماوێ ھەیڤەکێ دا دێ بوتە ترومبێلێ ڤەگۆھێزمە سەر ناڤێ تە.
گۆتژی پشتی پارێن خوە وەرگرتین چوو خوە بەرزەکر خودانێ ئێکێ یێ ترومبێلێ لێ گەریا ھێشتا 10 ھزار دولارێن وی یێن ماینە نک و نەداینێ ھندی لێ گەریا و پرسیارا وی کر نەدیت، دەلیڤەکێ دا ترومبێلا خوە دیت رابوو شکایەت ل وی کەسی کر یێ ترومبێلا خوە فروتیێ، پولیسان ژی نێزیکی 20 رۆژان لێ گەریان ل مالا وی و جھێ کارێ وی و کەس و کارێن وی پاشان پولیسان ل مالا وی ئەڤ کەسە دەستەسەرکرن و زیندانکرن.
زێدەتر گۆت: پشتی بۆ دادگەھێ دیار بوویی کو وی کەسی فێلکاری یا کری و ترومبێلا وی یا فروتی و پارێن وی یێن خارین و نەزڤراندینە ئانکو فێلکاری ل دو وەلاتیان کر یێ ئێکێ خودانێ ترومبێلێ یێ سالنامە ل سەر ناڤێ وی و یێ دویێ ژی ئەو کەسێ ترومبێل فروتیێ، پشتی ڤەکۆلینێ و ئامادەبوونا دیدەڤانا ل بەرامبەری دادگەھا کەتنێ ل سەر ڤی کەسی دوپات بو کو فێلکارییا کری و ب سزایێ شەش ھەیڤان ھاتە حوکمکرن.
ھەر ل دۆر ڤێ کێشێ ڤەکولەرێ جڤاکی رەعەد سابر دیار دکەت کو ئەو کەسێ فێلکارییان ل خەلکەکی دکەن کەسێن زیرەک و تێگەھشتینە رەوشەنبیریەکا ھەی ب کاردئینن بۆ ڤان کارێن بێخێر موخابن ئەڤ کەسە نەشێن ب رێیێن رەسمی و قانوونی بۆ خوە کارەکێ پاقژ بکەن، گۆتژی دێ رابن ڤێ رەوشەنبیری و شیانێن خوە ب کارئینن بۆ فێلکاریێ و وێ مەرەما خوە ب جە دئینن ژی و کەسێ بەرامبەری خوە قانع دکەن و زوو باوەردکەن و جڤاکێ کوردی ژی یێ دلنازکە، لێ ل جھێن دیتر دبێژن نەخێر قانوونە دڤێت بۆ مە ل سەر کاغەزەکێ ئیمزا بکەی کومپیالەیە، نەشێت فێلکاریێ بکەت.
ناڤھاتی ئاشکراکر ژی کو خەلکێ مە ھندەک جارا باوەرییەکا مەزن دەتە ھەڤالێ خوە بۆ نموونە دێ خوە دەرێخیت کەسەکێ زەنگین و زانا و ب راستی وەسا نینە ئەو ب خوە روبعەک د بەریکا وی دا نینە، دووماھییا وی ژی ھەر شەرمزاریە باوەریا وی نامینیت دێ ھەر فێلکاریا کەت دێ بینی ھەر ماوە ماوە دێ بەرێ خوە دەتە چەندین جھان.
