دایێ کانییا ژیانێ
ڕێژین حکمەت
گۆتنە من:
شعرەکێ ل سەر دارێژە…
بەلێ ئەز چ بکەم؟
دەمێ پەیڤ شەرم دکەن وەسفا وێ بکەن!
گۆتنە من:
چیڕۆکەکێ ل سەر بنڤێسە…
بەلێ پا چ بکەم؟
دەمێ پەرتووک تەنگ دبن ل بەر مێژوویا وێ!
ئەز چەوا وەسفا وێ بکەم؟
کو ئەو بخۆ «وەسفە»
بۆ هەر جوانییەکێ،
ئەو بخۆ «بێهنە»
بۆ گولێن نیسانێ،
و «رۆناهی یە»
بۆ تارییا ژیانێ…
دایێ…
خۆزی من «بایەک» هەبا،
بتنێ دا تۆزا سەر پێلاڤێن تە ماچی بکەم.
خۆزی من «دوعایەکا» قەبوولکری هەبا،
دا تەمەنێ خۆ بکەمە دیاری بۆ تەمەنێ تە.
خۆزی ئەز چ جاران مەزن نەبام،
دا چ جاران چاڤێن من پیربوونا تە نەدیتبان!
دایێ، دایکا من…
چەند ڕۆژێن ل گەل تە،
شرین و خۆشن.
ئەو دەستێن ماندی،
ئەو دەستێن نەرم،
یێن کو دەستێن من گرتین و
خەونێن مە تێدا شین بووین…
ئەو چاڤێن کویر و پڕ بێهنفرەهــ،
کۆچا مەیا بێ خەمییێ تێدا ددیارە…
تۆ دوعایا خودێ یی ل سەر ئەردی،
تۆ کانییا ژیانێ یی…
هەر چەند تێهناتییا من زێدە ببت،
هەر ب ناڤێ تە، دێ ئاڤ و بێهنڤەدانێ بینم.
