دده‌مێ 15 ده‌مژمێرێن بۆرى دا سێ روودانێن ته‌قه‌كرنێ ل ده‌ڤه‌را سۆران درۆست بووینه
ئه‌ڤرۆ نیوز ، نه‌وزاد هلۆرى:
دده‌مێ 15 ده‌مژمێرێن بۆرى دا ل سنورێ ده‌ڤه‌را سۆران یا سه‌ر ب پارێزگه‌ها هه‌ولێرێ ڤه سێ روودانێن ته‌قه‌كرنێ رووداینه و چار كه‌س بریندار بووینه و ته‌قه‌كه‌رێن وان روودانان ژلایێ پولیسان ڤه هاتنه ده‌سته‌سه‌ركرن.
هه‌وار ئه‌رگوشى، ئاخڤتنكه‌رێ پۆلیسێن ده‌ڤه‌را سۆران گۆت: (دده‌مێ 15 ده‌مژمێرێن بۆرى ل سنوورێ ده‌ڤه‌را سۆران كو قه‌زایێن سوران و ره‌واندوز و مێرگه‌سوور و چومان ب خوه‌ڤه دگریت ، سێ روودانێن ته‌قه‌كرنێ روویداینه و د ئه‌نجام دا چار كه‌س بریندار بووینه، روودانا ئێكێ ل تاخێ حه‌ریق ل ناڤ باژێرێ سۆران ل ده‌ما ئاریشه‌كا جڤاكى دناڤبه‌را ژن و مێره‌كێ دا روودايه ، ژنێ بزاڤا خوه كوشتنێ كریه و ده‌ما كو به‌رهه‌ڤبوویان دخواست رێگریێ ل وێ ژنێ بكه‌ن ، ئه‌وێ ته‌قه‌كر و دو كه‌س برینداركرن ، روودانا دویێ ، ل ناحیا مه‌زنێ یا سه‌ر ب قه‌زا مێرگه‌سوور ژى وه‌لاتیه‌ك ل ده‌ما ئاریشه‌كا جڤاكى بریندار بوویه پشتى كو ژلایێ چه‌ند كه‌سێن نێزیكێ وى ته‌قه لێ هاتیه‌كرن ، روودانا سێ یێ ژى ل ناحیا سمێلان یا سه‌ر ب قه‌زا چۆمان درۆستبوویه ، وه‌لاتیه‌ك ب مه‌ه‌رما گه‌شتوگۆزارێ هاتبوو ده‌ڤه‌رێ و ژ ئه‌نجامێ ته‌قه‌كا نه‌دیار هاته برینداركرن).
ئه‌رگوشى د په‌یچێ پۆلیسێن سۆران دا زێده‌تر گۆت: (ئه‌نجامده‌رێن وان روودانان كو ته‌قه‌كه‌ربوون هه‌موو هاتینه ده‌سته‌سه‌ركرن و ب گۆره‌ى قانوونێ پێرابوون دێ دگه‌ل وان هێنه وه‌رگرتن و ڤه‌كۆلین ل گه‌ل هێته‌كرن، بریندارێن وان روودانان ژى يێن هاتینه ره‌وانه‌كرن بۆ نه‌خوه‌شخانان داكو چاره‌سه‌ریا وان بهێته‌كرن).
