دهۆك: ده‌ست درێژیا سكسی ل سه‌ر 20 ژنان هاتیه كرن
ئەڤرۆ نیوز، زنار تۆڤی:
ب هەلکەفتا رۆژا جیهانی یا بەرهنگاربوونا توندوتیژیێ ل دژی ژنان و لدووڤ وان ئامارێن رێڤه‌به‌ریا توندوتیژیێ ل هه‌رێما كوردستانێ بەلاڤکرین، د ماوێ 10 هه‌یڤێن بوری دا ل سه‌ر ئاستێ هه‌رێما كوردستانێ توندوتیژی ل هەمبەری 8 هزار ژنان هاتیه كرن، دیسان 6 هزار سكالا ژی ل رێڤەبەریێن توندوتیژیێ هاتینه تۆماركرن، ژ ڤێ رێژێ ژی ل سنۆرێ پارێزگه‌ها دهۆکێ هزار و 800 سكالا هاتینه تۆما كرن، دیسان ده‌ست درێژیا سكسی ل سه‌ر 20 ژنان هاتیه كرن و سێ ژن ژی هاتینە کوشتن، هەروەسا 14 ژنان خوه سوتیه و 13 دیتر ژی خوه كوشتینه.
پارێزه‌ر بهائه‌دین ده‌شتانی، بۆ ئەڤرۆ نیۆز دیار کر: ئه‌گه‌رێن سەرەکی یێن توندوتیژیێ ڤەدگەرن بۆ، بارێ دارایی یێ خراب و نه‌بوونا پێدڤیێن مه‌زاختنێ یێن رۆژانه دناڤا خێزانێ دا ژ ئالیێ زه‌لامی ڤه، لێک تێنەگەهشتنا دناڤبەرا ژن و مێران دا هوکارەکێ دیترە، دیسان نەما باوەریێ دناڤبەرا خێزانێ دا و بێکاری و نەبوونا دەلیڤێن کاری وەکریه زەلام د میننە د مالدا، ئەڤە ژی دبیتە ئەگەرێ توندوتیژیێ، دیسان زێدەبوونا حالەتێن خیانەتا ھەڤژینیێ ژی ئەگەرەکێ سەرەکی یێ توندوتێژیێ یە.