ده‌رگه‌ه ل هه‌مبه‌رى كچا كورد ڤه‌بوویه كو پشكداریێ دكارێن سینه‌مایى دا بكه‌ت
ئه‌ڤرۆ نیۆز،زنار تۆڤى:
ئه‌كته‌را گه‌نج دیان جه‌میل د دیداره‌كێدا بۆ ئه‌ڤرۆ نیۆز دیاركر:هه‌تاكو نوكه وێ پشكدارى د دو فلمێن سینه‌مایى دا كریه،كو فلمێ ئێكێ ب ناڤێ”حه‌جحه‌جیك” یێ ده‌رهێنه‌رێ كورد مانۆ خه‌لیل بوویه،كو ل سالا بورى پشكدارى د چاره‌مین فلمه فیستیڤالا دهوكێ دا كربوو،هه‌روه‌سا ئه‌ڤ ساله‌ژى وێ پشكدارى د فلمێ سینه‌مایى”خه‌ونه‌ك به‌رى مرنێ” دا كریه و ئێكه‌م جاره ئه‌و رۆلێ سه‌ره‌كى د فلمه‌كێ سینه‌مایى دا دبینیت.
هێشتا گوت ژى:پشكداریا من دڤى فلمى دا باوه‌ریه‌كا مه‌زنتر دامن و هه‌روه‌سا هه‌بوونا كچێ د سینه‌مایێ دا دێ باوه‌ریه‌كا مه‌زنتر بۆ ژنا كورد چێكه‌ت،كو ئه‌و ژى دێ شێت مل ب ملێ زه‌لامان كارێن سینه‌مایى ئه‌نجام ده‌ن،هه‌روه‌سا نوكه ده‌رگه‌ه ل هه‌مبه‌رى كچا كورد ڤه‌بوویه،ژ پێخه‌مه‌ت ئه‌و ژى هه‌بوونا خوه د سینه‌مایێ دا ب سه‌لمینیت و دێ جڤاكێ مه ژى پێشكه‌فتنێ ب خوه‌ڤه بینیت.
ناڤهاتیێ گوت ژى:د ئه‌ڤان فلمان دا من په‌یاما خوه گه‌هاندیه كچا كورد،ژ پێخه‌مه‌ت ئه‌و ژى بهێنه د مه‌یدانا سینه‌مایێ دا،هه‌روه‌سا من د ئه‌ڤ ساله‌دا وه‌ك كچه‌كا ئێزدى پشكدارى د فلمه‌كێ دا كریه كو ل سه‌ر كچێن ئێزدیان بوویه،من رۆلێ سه‌ره‌كى د وى فلمى ژى دا گێرایه و ئه‌ڤ فلمه ژى نوكه یێ دقۆناغا دوماهیێ دا،هه‌روه‌سا ئه‌ز یا گه‌شبینم كو دێ سینه‌ما كوردى گه‌هیته ئاستێن بلند و ل نێزیك ئه‌م دێ گه‌هینه ئاستێ سینه‌ما جیهانى.