دورزیێن سووریێ داخوازا پشتەڤانیێ دکەن
ب هزاران وەلاتیێن دورزی ل ئەلمانیا و چەند وەلاتێن دی یێن ئۆرۆپا کۆمکوژیا بەری نها یا دورزیان ژ ئالیێ حوکمەتا شەرعی ڤە ب توندی شەرمزار کرن و داخواز ژ وەلاتێن ئێکەتیا ئۆرۆپا و ئەمریکا کرن کو بێی مەرج پشتەڤانیێ ل حوکمەتا شەرعی نەکەن، چونکی حوکمەتا نها یا سووریێ رێزێ ل مافێن نەتەوەیێن دی یێن ل سووریێ ناگریت و هەکە دەلیڤە بۆ بهێتە پێش دێ دیسان ئێرشی دورزیان و کوردان کەت و ژ بەر ڤێ یەکێ ژی دڤێت ئەمریکا، ئێکەتیا ئۆرۆپا و نەتەوەیێن ئێکگرتی ل هەمبەر رەوشا نها یا ل سووریێ بێ هەلوەست نەبن، چونکی هەتا نها ژی پرسا کوردان و دورزیان نەهاتیە چارەسەرکرن.
دورزیان ئەو یەک ژی دیار کرن، نابیت ئەمریکا و وەلاتێن ئێکەتیا ئۆرۆپا ژ بەر هندەک بەرژەوەندیێن خوە چاڤێ خوە ل کریارێن حوکمەتا شامێ بگرن، هەکە حوکمەتا ئەحمەد شەرع پێگەهێ خوە بهێز بکەت دێ دەست ب کۆمکوژیا کوردان و دورزیان و نەتەوەیێن دی یێن ل سووریێ کەت و ژ بەر ڤێ یەکێ ژی دڤێت رێگری ل شامێ بهێتە کرن.
دورزی داخواز دکەن دستوورەک نوو و دیموکراتی بۆ سووریێ بهێتە دانان و هەموو مافێن وان د دستووری دا بهێتە گەرەنتیکرن و هەتا ئەو یەک نەهێتە کرن ئەو خوە پشکەک ژ سووریێ نابینن و دێ بریارێ ل دۆر چارەنڤیسێ خوە دەن و داخوازا پشتەڤانیێ ل جڤاکێ نێڤدەولەتی دکەن.
